Жәнібек Әлімханұлы біріккен жекпе-жек алдында мәлімдеме жасады
Орта салмақта WBO және IBF тұжырымдары бойынша әлем чемпионы Жәнібек Әлімханұлы ресми түрде кубалық Эрисланди Ларамен өтетін біріккен жекпе-жектің жарияланғанынан кейін алғаш рет мәлімдеме жасады. Лара WBA тұжырымының чемпионы болып табылады.
Жекпе-жек 6 желтоқсан күні Америка Құрама Штаттарының Сан-Антонио (Техас штаты) қаласындағы Frost Bank Center аренасында өтеді. Әлімханұлы мен Лара арасындағы айқас кештің қосалқы басты оқиғасы болады, ал басты жекпе-жекте Исаак Крус пен Ламонт Роуч шаршы алаңға шығады.
«Менің мақсатым – барлық төрт чемпиондық белбеуді біріктіріп, атымды бокс тарихына жазу. Бұл жолда мен көп жылдар бойы тер төктім, басқа чемпиондарға шақыру тастадым, енді Лара келісімін берді. 6 желтоқсанда үлкен жекпе-жек күтіп тұр! Алла қаласа, үшінші белбеуді иеленемін. Тарих түзілуге жақын», – деп мәлімдеді Әлімханұлы.
Кешті ұйымдастыруды аты аңызға айналған промоутер Боб Арум басқаратын Top Rank компаниясы қолға алады. Тікелей эфир Қазақстан уақытымен 7 желтоқсан, жексенбі күні таңғы 07:00-де басталады.
Сондай-ақ Әлімханұлының бапкері алдағы жекпе-жек алдындағы дайындық жайлы айтты.