WBO Әлімханұлы мен Шираздың титулдық жекпе-жегіне қатысты жаңа шешім жариялады
WBO қазақстандық боксшы Жәнібек Әлімханұлы мен Хамза Шираздың екінші орта салмақтағы титулдық жекпе-жегіне қатысты жаңа шешімін жариялады, деп хабарлайды Sports24.kz.
Боксшыларға келісімді түпкілікті келісіп, оны WBO-ға ұсыну үшін тағы бір апта берілді. Мерзім 2026 жылғы 10 қыркүйек, бейсенбі күні Атлантикалық стандартты уақыт бойынша (AST) сағат 17:00-ге дейін ұзартылды.
«Егер тараптар келісімге келе алмаса және оны белгіленген мерзімде ұсынбаса, WBO чемпиондық титулдар жөніндегі комитеті белгіленген тәртіпке сәйкес промоутерлік сауда (purse bid) өткізуді талап етеді», – делінген ұйымның мәлімдемесінде.
Бұған дейін ұйым қазақстандық боксшыны Хамза Ширазға тиесілі әлем чемпионы атағына міндетті үміткер деп таныған болатын.
Айта кетейік, Әлімханұлы Сауль «Канело» Альвареспен ықтимал жекпе-жек туралы тағы да пікір білдірді. Қазақстандық боксшы ықтимал жекпе-жекте өз мүмкіндігін әлі де жоғары бағалайтынын және мексикалық боксшыны жақсы зерттеген қарсылас деп санайтынын растады.
