Торехан Сабырхан Азиада-2026 ойындарындағы келесі қарсыласын білді
Жапонияда қазақстандық боксшы Торехан Сабырханның 2026 жылғы Азия ойындарындағы ширек финалдағы қарсыласы анықталды, деп хабарлайды Sports24.kz.
70 келіге дейінгі салмақ дәрежесіндегі 1/8 финалда Үндістан өкілі Сумит пен Ирак боксшысы Али Аль-Саррай кездесті.
Сумит жекпе-жекті сенімді бастап, алғашқы екі раунд бойы қарсыласынан басым түсті. Үндістандық боксшы Аль-Саррайдан жиі озып, дәл соққыларды көбірек дарытты. Бірінші раундта барлық төреші оның пайдасына шешім шығарса, екінші раундта бес төрешінің үшеуі Сумитті жоғары бағалады.
Алайда үшінші раундта жекпе-жектің барысы өзгерді. Сумит аяғынан жарақат алып, кездесуді жалғастыра алмады. Нәтижесінде жекпе-жек тоқтатылып, техникалық нокаутпен жеңіс Али Аль-Саррайға берілді.
Осылайша, дәл осы Ирак өкілі Торехан Сабырханның Азиададағы ширек финалдағы қарсыласы атанды. Олардың жекпе-жегі 28 қыркүйекте өтеді.
