Райан Гарсия сот алдында. Боксшыға Жапониядағы жекпе-жекті бұзды деп айып тағылды
Америкалық боксшы Райан Гарсия тағы да даулы жағдайға тап болды, бұл жолы іс сотқа жетті. FANMIO атты көрнекі жекпе-жектер ұйымдастыратын компания Гарсияны келісімді бұзды деп айыптауда, өйткені ол Жаңа жыл қарсаңында Жапонияда Рукия Анпомен жекпе-жекке шығуы керек болған, бірақ жекпе-жектен бас тартты.
FANMIO мәлімдеуінше, боксшы төлем алып, дайындалғанына қарамастан, ақыры жекпе-жекке шықпай, жарақатына сілтеме жасады. Енді ол 2 мамырда Роландо Ромероға қарсы жекпе-жек өткізуді жоспарлап отыр, бұл FANMIO-ның пікірінше, келісімшарттың тікелей бұзылуы.
“Райан алдын ала гонорар алып, дайындалғандай көрінді, бірақ жекпе-жекке шығу оның ниетінде болмағанын түсіндік”, – деп мәлімдеді FANMIO өкілдері.
Сондай-ақ, компания Golden Boy Promotions промоутерлік ұйымын жекпе-жекті әдейі болдырмауға тырысты деп айыптады.
“Біз бұл жекпе-жек үлкен жетістікке жететініне сенімді болдық. FANMIO оның жарнамасына қомақты қаржы мен уақыт жұмсады. Бірақ енді біз сотқа жүгініп, кеткен шығынды өндіріп алуды талап етеміз. Мұндай әділетсіз іскерлік әрекеттерге жол берілмеуі керек”, – деді ұйым өкілдері.
Енді Гарсия келісімшартты бұзды ма, жоқ па – сот шешетін болады. FANMIO бұл мәселені соңына дейін жеткізіп, шығынды қайтаруды талап етеді.
Айта кету керек, FANMIO ірі көрнекі жекпе-жектерді ұйымдастыруымен танымал. 2021 жылы дәл осы компания Логан Пол мен Флойд Мейвезердің жекпе-жегін өткізген болатын.
Бұған дейін Райан Гарсия Дана Уайт пен Турки Әл-Шейхтің жаңа бокс жобасы туралы өз пікірін білдірген еді.