Олимпиада чемпионы Серік Сәпиев өз компаниясын ашты
Бокстан Олимпиада чемпионы Серік Сәпиев «Астана» халықаралық қаржы орталығында (АХҚО) жаңа компания тіркеді, деп хабарлайды Sports24.kz.
«Enzo Ltd. жеке компаниясы» деп аталатын заңды тұлға 2026 жылғы 11 қыркүйекте тіркелген.
Компанияның қызмет түрі холдингтік бағыт ретінде көрсетілген. Жарғылық капиталы 300 мың теңгені құрайды және номиналды құны 3 мың теңгеден болатын 100 акцияға бөлінген.
Ашық деректерге сәйкес, Серік Сәпиев компанияның жалғыз құрылтайшысы, сондай-ақ CEO және директоры болып табылады. Сонымен қатар қол қою құқығы бар тұлға ретінде де көрсетілген.
Сәпиев бұдан бөлек бірнеше заңды тұлғаның құрылтайшысы. Олардың қатарында «Sport Asset Management» қоғамдық бірлестігі, «Жас Сарбаз» балалар-жасөспірімдер әскери-патриоттық қозғалысы» РҚБ, Алматы облысының кәсіпқой бокс федерациясы, Қазақстан кабадди федерациясы және «Astana Arlans Promotion» қоғамдық бірлестігі бар.
Серік Сәпиев 1983 жылы Қарағанды облысында дүниеге келген. Ол – Лондон-2012 Олимпиадасының чемпионы, 2005 және 2007 жылдардағы әлем чемпионы, сондай-ақ Олимпиада ойындарындағы ең техникалық боксшыға берілетін Вэл Баркер кубогының иегері. Сәпиевке Қазақстан Республикасының еңбек сіңірген спорт шебері атағы берілген.
Қазіргі уақытта ол Қазақстан Республикасының Туризм және спорт министрінің штаттан тыс кеңесшісі қызметін атқарады. Сондай-ақ XX жазғы Азия ойындарына дайындық жөніндегі штабтың спорт бағытының үйлестірушісі болып табылады.
