Керемет нәтиже: Қазақстан Түркістандағы халықаралық бокс турнирінде үстемдік құрды

Бокс 26 сәу 2025 23:31

Арсен Алиев

Редактор

Түркістандағы Olympic Center спорт кешенінде КСРО-ның еңбек сіңірген спорт шебері, Қазақстан Республикасының еңбек сіңірген жаттықтырушысы, ұлттық құраманың бұрынғы бас бапкері Абдысалан Нұрмахановтың құрметіне арналған XXXI халықаралық бокс турнирі өз мәресіне жетті.

Турнирде 13 салмақ дәрежесінде жүлделер сарапқа салынды. Қазақстандық спортшылар тамаша өнер көрсетіп, 12 алтын медальді жеңіп алды. Турнир жеңімпаздары атанғандар: Нұрғыса Тұрабеков (48 кг), Дарын Құлжабаев (51 кг), Самат Жетібаев (57 кг), Нұрболат Бекбауов (60 кг), Архат Тұрғынбек (63,5 кг), Әбдіғалым Әбдікерім (67 кг), Ахмет Үсен (71 кг), Нариман Асқарұлы (75 кг), Азамат Бектас (80 кг), Бекболат Әбдікерім (86 кг), Нұрмағанбет Юсупов (92 кг) және Даниял Сапарбай (92+ кг).

Тек 54 келі салмақ дәрежесінде Қырғызстан өкілі Нұржігіт Дүйшебаев алтын медаль жеңіп алып, өзгелердің үстемдігін бұза алды.

Турнирге Қазақстан, Өзбекстан, Қырғызстан және Тәжікстан елдерінен келген шамамен 100 спортшы қатысты.