Иван Дычконың промоутері Канело андеркардындағы төрешілік дауға қатысты мәлімдеме жасады
All Stars Boxing промоутерлік компаниясының басшысы Зия Алиев эксклюзивті сұхбатында Sports24.KZ Сауль Альварес (63-2-2, 39 КО) пен америкалық Теренс Кроуфорд арасындағы екінші орта салмақтағы абсолютті әлем чемпионы атағы үшін өткен жекпе-жектің андеркардында қазақстандық боксшы Иван Дычконың жеңілісіне қатысты пікір білдірді.
35 жастағы боксшы үшін бұл ерекше сынақ болды – тәжірибелі америкалық Джермейн Франклин оның мінсіз жеңіс сериясын тоқтата алған алғашқы қарсылас атанды. Он раундқа созылған айқас аса шиеленісті өтті: Дычко өз ырғағын таңуға және шешуші соққы жасауға тырысқанымен, қарсыласы қорғаныста сауатты әрекет етіп, шешуші сәттерде бірінші нөмірмен жұмыс істеді. Төрешілердің бірауыздан қабылдаған шешімі бойынша жеңіс Франклинге берілді.
«Төрешілердің шешімі, сөзсіз, тосын болды. Меніңше, бұл тек біз үшін емес, сондағы барлық көрермендер үшін — комментаторлар, промоушен өкілдері, соның ішінде Макс Келлерман мен Майк Коппинджер үшін де күтпеген жайт. Оның үстіне, бейтарап төрешілердің жазбаларында жеңіс Иванға берілді. Әйтеуір, ресми төрешілер басқаша ойлаған сияқты — мүмкін, олар Иваннан көбірек агрессия күтті», - деді Зия Алиев.
Дычко мен Франклин-кіші арасындағы жекпе-жек туралы толығырақ осында оқи аласыз.