Головкин Кроуфордқа қарсы супержекпе-жек үшін қайта оралуы мүмкін бе?
Геннадий Головкиннің рингке қайта оралуы мүмкін деген ишарасы әлемдік бұқаралық ақпарат құралдарында жаңа талқылауларға себеп болды. Бұл тақырыпқа енді үш дүркін абсолютті әлем чемпионы Теренс Кроуфордтың бапкері Брайан Макинтайр да үн қосты.
Британдық басылымға берген сұқбатында ол Головкин мен Кроуфорд арасындағы мүмкін гипотетикалық жекпе-жекке пікір білдірді.
«Әңгіме Теренс туралы болса, сенімді түрде айтарым: оның қарсысына кім шықса да, ең мықты шағында Кроуфорд бәрібір үстем болар еді. Оның ойлау қабілеті мен боксшы ретіндегі IQ-і ерекше жоғары», – деді Макинтайр.
Айта кетейік, Головкин соңғы рет 2022 жылдың 17 қыркүйегінде Сауль «Канело» Альвареспен кездесіп, ұпай санымен жеңіліп қалған еді. Дегенмен, ол ресми түрде мансабын аяқтағанын хабарлаған жоқ.
Геннадийдің кәсіби рингтегі жетістіктері әсерлі: 45 жекпе-жек, оның ішінде 42 жеңіс (37-сі нокаутпен), 2 жеңіліс (екеуі де Альварестен) және 1 тең нәтиже.