Геннадий Головкин World Boxing президенті қызметіне таласта атақты қарсыласқа ие болды
Ауыр салмақтағы даңқты экс-чемпион Владимир Кличко World Boxing президенті лауазымына өтетін сайлауға қатысады, деп хабарлайды Inside The Games.
Ақпарат көзіне сүйенсек, World Boxing-тің қазіргі президенті Борис Ван дер Ворст қайта сайлануға үміткер болмайды.
Кличкодан бөлек, бұл додада қазақстандық бокстың аңызы Геннадий Головкин мен Грекия бокс федерациясының президенті Харис Мариолис те бақ сынайды.
World Boxing-тің сайлау процесі мен дауыс беру ережелеріне сәйкес, барлық кандидаттар тәуелсіз комиссия тарапынан ашық мәліметтер негізінде бағаланады. Комиссия құрамында бұған дейін World Boxing-пен байланысы болмаған үш тәуелсіз сарапшы бар және оған Sport Resolutions, спорттағы төрелік пен делдалдық қызметтер көрсететін британдық компания, қолдау көрсетеді.
World Boxing президентін сайлау 2025 жылдың қарашасында өтеді. Дауыс беруге жіберілген кандидаттардың соңғы тізімі кем дегенде дауыс беруден 30 күн бұрын жарияланады.
Бұған дейін Головкиннің бұрынғы бапкері Юбэнк-кішімен жекпе-жек өту ықтималдығына баға берген болатын.