Айбек Оралбай Азиада-2026 финалында кіммен жұдырықтасады: Жахонгир Зокиров несімен қауіпті?
Айбек Оралбай Азиада-2026 финалындағы қарсыласын білді. 90 келіден жоғары салмақта Қазақстан құрамасының капитаны алтын медаль үшін Өзбекстан өкілі Жахонгир Зокировпен жұдырықтасады. Бокс турнирінің финалдық кездесулері 2 қазанда өтеді, деп хабарлайды Sports24.kz.
Бұл екі боксшы үшін алғашқы кездесу емес. Соңғы екі жылда Оралбай мен Зокиров рингте үш рет жолығып үлгерді. Қазір жеке кездесулердегі есеп 2:1 есебімен қазақстандық боксшының пайдасына.
ЖАХОНГИР ЗОКИРОВ КІМ?
23 жастағы Жахонгир Зокиров Жизақта дүниеге келген және аса ауыр салмақта өнер көрсетеді. Ол солақай боксшы және қазірдің өзінде Өзбекстанның жаңа буын ауыр салмақтағы ең танымал өкілдерінің біріне айналған.
Зокиров халықаралық аренада жасөспірім кезінен көзге түсе бастады. 2021 жылы ол 91 келіден жоғары салмақта жастар арасындағы әлем чемпионатын жеңіп алды. Кейін 22 жасқа дейінгі боксшылар арасында Азия чемпионы атанды.
Ересектер арасындағы ең үлкен жетістігі 2025 жылы болды. Ливерпульде өткен World Boxing әлем чемпионатында Зокиров финалға дейін жетіп, күміс медаль иеленді. Шешуші жекпе-жекте оны тоқтатқан боксшы - дәл Айбек Оралбай.
ОРАЛБАЙМЕН ҮШ РЕТ КЕЗДЕСКЕН
2024 жылдың желтоқсанында Азия чемпионатында Айбек Оралбай Зокировты жеңді. Ал 2025 жылдың ақпанында Софияда өткен Странджа кубогында өзбекстандық боксшы қарымта қайтарып, төрешілердің бөлек шешімімен басым түсті. Үшінші кездесу 2025 жылғы әлем чемпионатының финалында өтіп, онда Оралбай қайтадан жеңіске жетті.
ЗОКИРОВ НЕСІМЕН ҚАУІПТІ?
Өзбек боксшысының басты артықшылықтары - бойы мен қолының ұзындығы, солақай тұрысы және ауыр соққысы.
Оның сол қолы әсіресе қауіпті. Жастар арасындағы әлем чемпионатында-ақ мамандар Зокировтың сол қолмен және денеге бағытталған соққыларын ерекше атап өткен. 2021 жылғы финалда қарсыласына бірнеше ауыр соққы тигізгеннен кейін төреші жекпе-жекті мерзімінен бұрын тоқтатуға мәжбүр болды.
Қазіргі Азиадада да Зокиров сенімді өнер көрсетіп келеді. Ширек финалда ол тәжікстандық Мухаммад Аброридиновты 5:0 есебімен жеңді.
Ал жартылай финалда өзбек боксшысы одан да қауіпті көрінді. Бірінші раундтың өзінде ирандық Амир Эсмаили Вандеиді екі рет нокдаунға түсірді. Екінші раундта төреші тағы есеп ашып, кейін қарсыласының қатты жарақатына байланысты жекпе-жекті тоқтатты.
ОРАЛБАЙДЫ ӨЗІ БАСТЫ ҚАРСЫЛАСТАРЫНЫҢ БІРІ ДЕП АТАҒАН
Қызығы, Азиада алдында Зокировтың өзі Айбек Оралбайды басты қарсыластарының бірі ретінде атап өткен.
Өзбекстандық боксшы Айбектің жекпе-жектерін бақылап жүретінін айтып, оны әуесқой бокстағы негізгі бәсекелестерінің қатарына қосқан.
Сонымен қатар, Зокиров кәсіпқой бокста да өнер көрсетіп жүр. 2026 жылдың маусымында ол Лас-Вегаста бұған дейін жеңілмеген америкалық Закари Спиллерді екінші раундта техникалық нокаутпен жеңді.
ТАРИХЫ БАР ФИНАЛ
Айбек Оралбай үшін бұл жай ғана Азиада финалы емес.
Бір жыл бұрын дәл осы Зокиров оның әлем чемпионатының финалындағы қарсыласы болған. Сол кездесуде қазақстандық боксшы аса ауыр салмақта тарихи алтын жеңіп алды.
Енді Өзбекстан өкілі Азия ойындарының финалында реванш алуға тырысады. Ал Оралбай жеке кездесулердегі басымдығын 3:1-ге жеткізіп, әлем чемпионы атағына Азиада алтынын қосуды көздейді.
Сондықтан 90 келіден жоғары салмақтағы Қазақстан - Өзбекстан финалы бокс турниріндегі ең принципті жекпе-жектердің біріне айналуы мүмкін.
