Футбол тарихындағы ең үздік 15 сұрмерген. Олар кімдер?
Футбол тарихында тамаша гол соғатын көптеген шабуылшылар бар. Бұл ойынның жанкүйерлері олардың көбін жақсы біледі. Дегенмен Sports24.kz ұлы футболшылардың жетістіктерін еске түсіріп, тарихтағы ең үздік 15 сұрмергеннің рейтингін ұсынады.
15. Гленн Фергюсон — 563 гол
Гленн Уильям Фергюсон 1969 жылы 10 шілдеде Белфастта дүниеге келген. Мансабының басым бөлігін Ирландия лигаларында өткізіп, «Ардс», «Гленавон» және «Линфилд» клубтарында ойнады.
Шабуылшы жалпы 563 гол соғып, Солтүстік Ирландия құрамасы сапында жеті матч өткізді.
14. Златан Ибрагимович — 573 гол
Швециялық форвард кәсіби мансабын «Мальмеде» бастап, кейін «Аякс», «Ювентус», «Интер», «Барселона», ПСЖ және «Манчестер Юнайтед» клубтарында өнер көрсетті. Ол мансабын 2023 жылы «Миланда» аяқтады.
Ибрагимович Швеция құрамасы сапында 122 матч өткізіп, 62 гол соқты.
13. Луис Суарес — 609 гол
Уругвайлық шабуылшы мансабын «Насьональ» клубында бастап, кейін «Аякс», «Ливерпуль», «Барселона» және «Атлетико Мадрид» командаларында ойнады. Уругвай құрамасы сапында Суарес 143 матчта 69 гол соқты. Клубтық мансабында ең көп голды — 198 — «Барселона» үшін енгізді.
2025 жылдың қазанында Суарес мансабындағы 600-ші голын соқты.
12. Эусебио — 623 гол
«Қара қабылан» деген лақап атпен танылған португалиялық форвард Эусебио да Силва Феррейра жылдамдығымен, атлетизмімен және қуатты соққысымен ерекшеленді. 1961 жылы ол «Бенфикаға» ауысып, мансабының негізгі бөлігін осы клубта өткізді.
1966 жылғы әлем чемпионатында Эусебио тоғыз гол соғып, турнирдің үздік сұрмергені атанды.
11. Абэ Ленстра — 624 гол
Нидерландтық шабуылшы Эйб Ленстра мансабында бар болғаны үш клубта ойнап, мансабының көп бөлігін «Херенвенде» өткізді. Нидерланд құрамасы сапында 47 матчқа қатысып, 33 гол соқты.
Клуб деңгейінде Ленстра «Херенвен» сапында 523 гол енгізді.
10. Джо Бамбрик — 626 гол
Джозеф Гардинер Абсолом Бамбрик 1926-1939 жылдар аралығында «Гленторан», «Линфилд», «Челси» және «Уолсолл» клубтарында өнер көрсетті. «Линфилд» сапында ол 509 гол соқты.
Ирландия құрамасы үшін Бамбрик 11 матчта 12 гол соқты.
9. Джимми Джонс — 647 гол
Джимми Джонс Ирландия футбол лигасының ең үздік сұрмергені саналады — оның еншісінде 648 гол бар. Клубтық мансабында ол «Белфаст Селтик», «Ларн», «Фулхэм» және «Гленавон» командаларында ойнады.
Солтүстік Ирландияның негізгі құрамасы сапында Джонс үш матч өткізіп, бір гол соқты.
8. Герд Мюллер — 724 гол
«Бомбардир» деген лақап атқа ие болған неміс футболының аңыз ойыншысы Герд Мюллер мансабының көп бөлігін «Баварияда» өткізді. Ол Германияның үздік сұрмергені атағын жеті рет, ал Еуропаның үздік гол соғушысы атағын екі рет жеңіп алды.
Германия құрамасы сапында Мюллер 62 матчта 68 гол соқты, ал «Бавария» үшін 565 рет мергендік танытты.
7. Роберт Левандовски — 734 гол
Поляк футболшысы мансабын «Знич Прушкув» клубында бастап, кейін «Лех», дортмундтық «Боруссия», «Бавария» және «Барселона» командаларында ойнады. Левандовски Польша құрамасы сапында 163 матч өткізіп, 88 гол соқты. «Бавария» үшін 344 гол енгізсе, 2020/21 маусымында 55 рет мергендік танытты.
2024 жылдың қазанында форвард мансабындағы 700-ші голын соқты.
6. Ромарио — 745 гол
Бразилиялық шабуылшы Ромарио мансабын «Васко да Гамада» бастап, кейін ПСВ, «Барселона», «Валенсия», «Фламенго» және «Флуминенсе» клубтарында ойнады.
Бразилия құрамасы сапында ол 70 матч өткізіп, 55 гол соқты.
5. Пеле — 786 гол
Пеле «Сантос» сапындағы дебютін 15 жасында жасады және клубтық мансабының басым бөлігін екі командада — «Сантос» пен «Нью-Йорк Космоста» өткізді.
Бразилия құрамасының аңыз шабуылшысы 92 матчта 77 гол соқты.
4. Ференц Пушкаш — 802 гол
Венгриялық Ференц Пушкаш 1950-жылдардағы Венгрия құрамасының басты жұлдыздарының бірі болды. Клубтық деңгейде ол «Будапешт Гонвед» пен «Реал Мадрид» сапында ойнап, онда Альфредо Ди Стефаномен атақты дуэт құрды.
Венгрия құрамасы үшін Пушкаш 85 матч өткізіп, 84 гол соқты.
3. Йозеф Бицан — 809 гол
Йозеф Бицан Венада дүниеге келген және өз дәуірінің ең нәтижелі шабуылшыларының бірі саналды. «Славия» сапында чемпионаттар мен кубоктарда 416 гол соғып, мансабын 1955 жылы аяқтады.
Австрия және Чехословакия құрамалары үшін Бицан тиісінше 14 және 12 гол соқты.
2. Лионель Месси — 926 гол
Лионель Месси мансабының көп бөлігін «Барселонада» өткізді. Кейін ПСЖ мен «Интер Майами» клубтарында ойнады. «Барселона» сапында 672, ПСЖ үшін 32, ал «Интер Майами» құрамында 81 гол соқты. 2026 жылдың 18 наурызында Месси «Нэшвилл СК»-ға қарсы матчта мансабындағы 900-ші голын соқты.
Аргентина құрамасы сапында ол 196 матч өткізіп, 115 гол соқты.
1. Криштиану Роналду — 977 гол
Криштиану Роналду мансабын «Спортингте» бастап, кейін «Манчестер Юнайтед», «Реал Мадрид», «Ювентус» және «Аль-Наср» клубтарында өнер көрсетті. «Реал» сапында 438 матчта 450 гол, «Ювентус» үшін 133 матчта 101 гол, ал «Манчестер Юнайтедтегі» екінші кезеңінде 54 матчта 27 гол соқты.
Роналду — Португалия құрамасының рекордсмені: 226 матч және 143 гол. 2026 жылғы 5 қыркүйектегі жағдай бойынша оның мансабында 977 гол бар.
