Антон Чичулин Қазақстан футболының басты үміттері ретінде Сатпаев пен Абраевты атады
Антон Чичулин — жас футболшыдан бастап бапкерге дейінгі жолды өткен Қазақстан құрамасының бұрынғы ойыншысы. Ол ұлттық команда сапында іріктеу кезеңдеріне қатысып, Суперлигада ойнады және мансабының бір бөлігін Түркияда өткізді. Қазіргі уақытта Чичулин «Жеңіс» дубль командасының жаттықтырушысы, бұған дейін «Оқжетпес» бас бапкерінің көмекшісі және «Астана» футбол орталығында еңбек еткен.
Sports24.kz-ке берген сұхбатында Чичулин ұлттық құрамадағы алғашқы матчты еске алып, мансабындағы ең ауыр қарсылас — Германия құрамасы және неміс футболшысы Месут Озилдің техникасы туралы айтып берді. Ол сондай-ақ, ойыншыдан бапкерлікке өту оңай болмағанын шынайы жеткізді.
Сонымен қатар, экс-футболшы қазақстандық футболдың болашағынан үміт күттіретін жас ойыншылар жайында ойын бөлісіп, қазіргі маусымдағы ҚПЛ нәтижесіне болжам жасады.
- Ойыншылық мансабыңыздағы ең жарқын сәт қайсы болды?
- Кез келген футболшы үшін ең ерекше сәт — ұлттық құрамадағы алғашқы ойын. Мен үшін бұл іріктеу турниріндегі дебюттік матч болды. Суперлигада (ҚПЛ) алаңға алғаш рет қосалқы құрамнан шыққаным да есімде ерекше қалды.
- Құрама сапындағы ең ауыр матч қандай болды? Қарсыластарыңыздың арасынан қай әлемдік жұлдыздарды ерекшелеп айта аласыз?
- Біз жиі Еуропа чемпиондары Грекия, Португалия сынды гранд құрамаларға қарсы ойнадық. Бірақ ең қиын матч — Германия құрамасына қарсы кездесу болды. Бұл команда қорғаныста да, шабуылда да өте мықты. Ал жеке ойыншылар туралы айтсам, бірден Месут Озил еске түседі: оның техникасы өте жоғары деңгейде, сондықтан оған қарсы ойнау ерекше қиындық туғызды.
- Түркиядағы мансабыңыз туралы айтып берсеңіз: қандай қиындықтар болды және қазақстандық футболдан айырмашылығы неде?
- Алғашқы кезде бейімделу оңай болмады, ойынға көп шықпадым. Жаңа бапкер келген соң ғана жағдай өзгерді — ол маған сенім артып, алаңға шығара бастады. Түркиядағы футбол деңгейі шынымен жоғары, инфрақұрылымы да керемет: жақсы базалар, алаңдар, футболшыға қажетті барлық жағдай бар. Уақыт өте келе өзімді өте жайлы сезіндім, маған қатты ұнады. Әлі бірнеше маусым қалуға болар еді, бірақ басқа себептерге байланысты Қазақстанға оралуыма тура келді.
- Командадағы әріптестеріңіздің арасынан кімді атап өтер едіңіз?
- Клубтарда Авдеев, Жалмағамбетов сынды мықты футболшылармен бірге ойнадым — олардан көп нәрсе үйрендім. Құрамада ерекше көзге түскен — Самат Смақов. Бірақ Эмиль Кенжисариевті ерекше атап өткім келеді: ол — еліміздің үздік футболшыларының бірі деп санаймын, бірге ойнағаным — мен үшін үлкен мәртебе. Әрине, қақпашы Давид Лорияны да ұмытпаймын. Ол қақпада тұрған кезде оның сенімділігі мен тұрақтылығы бүкіл командаға күш беретін.
- Қазір «Жеңіс» дубль командасының бапкерісіз, бұған дейін «Оқжетпесте» көмекші, «Астана» футбол орталығында жұмыс істедіңіз. Ойыншылықтан бапкерлікке өту қалай өтті?
- Алғашқыда маған да оңай болған жоқ — айтқандай, ішімдегі футболшыны «өлтіре» алмадым: ойнауға күшім де, ықыласым да болды, бірақ бәрін күрт тоқтатуға тура келді. Бұл өте қиын кезең болды, бейімделу екі жылдай уақыт алды — бәрі бірден оңай болған жоқ. Бірақ соңы жақсы болды: қазір футболда қалып, бапкер ретінде дамып келемін.
- Құрамада ойнап, Еуропада өнер көрсеткісі келетін жас футболшыларға қандай кеңес берер едіңіз?
- Футбол — үлкен еңбек, ол үшін көп нәрседен бас тартуға тура келеді. Қазір айналада қызықтыратын нәрселер мен ойын-сауық өте көп, соларға алаңдап кету оңай. Бірақ менің ойымша, ең бастысы — футболды бірінші орынға қойып, өзіңмен жұмыс істеу: күн сайын тек физикалық емес, ой-сананы да дамыту керек. Футболға бар жан-тәніңді берсең, ол саған міндетті түрде жауап қайтарады.
- Қазақстандық футболдың жас буыны арасынан болашақ жұлдыз ретінде кімді атар едіңіз?
- Әрине, Сатпаев ерекше көзге түседі — ол қазірдің өзінде құрама сапында, жақын арада Еуропаны бағындыруға аттанады деп сенемін. Сондай-ақ, «Астана» дубль командасында ойнаған Максат Абраевты атап өткім келеді: ол жеке шеберлігі жоғары футболшы. Оған жарқын болашақ пен ұзақ мансап тілеймін — өте талантты әрі болашағынан зор үміт күттіретін ойыншы. Тағы басқа жастар да бар, бірақ оларға әлі көп еңбектену керек, сонда ғана ҚПЛ-де және ұлттық құрамада өз орнын таба алады.
- ҚПЛ маусымы қалай аяқталады деп ойлайсыз? «Ордабасы» қызықты ойын көрсетіп жүр, ал «Оқжетпес» лига грандтарына қауіп төндіріп келеді. Кімдер үздік үштікке кіреді?
- «Оқжетпес» расымен жақсы ойын көрсетіп жүр — ешкімнен қорықпай, кез келген қарсыласқа батыл, комбинациялық футбол ұсынады. Олардың ойыны маған ұнайды. Үздік үштіктен «Ордабасы» мен «Қайрат» көрінеді деп ойлаймын, ал үшінші орын үшін беске жуық клуб күреседі — нағыз тартыс болады.
Автор: Кирилл Качелаев.