Өз үйіндегідей: Рим жанкүйерлері Бубликке ерекше қолдау көрсетті
Александр Бублик ATP-1000 санатындағы беделді Рим турнирінде жеңіспен бастады. Қазақстандық теннисші алғашқы айналымда ресейлік Роман Сафиуллинді 6:3, 7:6 (7:4) есебімен ұтты. Кездесу турнирдің ең көрнекті корттарының бірі - Никола Пьетранджели атындағы кортта өтті.
Италияда өткен матчқа қарамастан, Бублик өзін туған жеріндегі кортта жүргендей сезінді. Әр ұпай, әр сәтті соққысы көрермендердің қошеметімен, қолдауымен және жылы лебіздерімен сүйемелденіп отырды. Әсіресе матч барысында 1:4 есебімен ұтылып жатқан сәттерде де жанкүйерлер үнсіз қалмады - олар Александрдың басты тірегіне айналды.
Енді келесі кезеңде Бублик Мадрид турнирінің қазіргі чемпионы, норвегиялық Каспер Руудпен кездеседі. Айта кетейік, қазіргі таңда Александр ATP рейтингінде 76-орында тұр.