Шевченкодан сенсация: Қазақстан United Cup-2025 турнирін Грекияны жеңумен бастады
Күннің алғашқы матчында ерлер кортқа шықты. Қазақстандық теннисші Александр Шевченко, ATP рейтингінде 78-орында тұрған спортшы, Грекия өкілі Стефанос Циципаспен кездесті. Әлемдік рейтингте 11-орында тұрған Циципасқа қарсы Шевченко сенсациялық жеңіске қол жеткізді. Қазақстандық спортшы екі сетте 6:4, 7:6 есебімен жеңіске жетті. Матчтың ұзақтығы 1 сағат 52 минутты құрады.
Турдың екінші матчында Қазақстандық Елена Рыбакина мен грек спортшысы Мария Саккари арасындағы кездесу өтеді деп күтілуде. Ал жұптық аралас разрядта Шевченко мен Рыбакина жұбы Циципас пен Саккариге қарсы ойнайды.
Қазіргі уақытта Қазақстан және Грекия құрамалары Испанияны артқа тастап, топта көш бастап келеді.
United Cup-2025 турнирінің ширек финалына Перт қаласында үш топтың жеңімпаздары және екінші орын алған құрамалардың ішіндегі үздігі шығады. А тобында плей-оффқа шығу үшін АҚШ, Канада және Хорватия күресуде, ал Е тобында Қытай, Германия және Бразилия бақ сынауда.