Елена Рыбакинаның Индиан-Уэллс турниріндегі алғашқы қарсыласы анықталды
Әлемнің жетінші ракеткасы Елена Рыбакина АҚШ-тың Индиан-Уэллс қаласында өтетін WTA-1000 санатындағы турнирдегі алғашқы кездесуіне дайындалуда. Қазақстандық теннисші әлемдік рейтингте 64-орында тұрған нидерландтық Сюзан Ламенспен кездеседі. Рыбакина мен Ламенс арасындағы кездесу 9 наурызда, Астана уақытымен 23:00-де өтеді.
Рыбакинаға қарсылас атанған Ламенс турнирдің алғашқы айналымында чехиялық Мария Боузковамен кездесіп, үш сетке созылған тартысты матчта жеңіске жетті. Ойынның қорытындысы: 3:6, 6:3, 6:3. Кездесу 2 сағат 29 минутқа созылды, ал нидерландтық спортшы бірінші сетте жеңілгеніне қарамастан, ойын тағдырын өзгерте алды.
Индиан-Уэллс турнирі дәстүрлі түрде әлемнің үздік теннисшілерін жинайды. Өткен жылы чемпиондық атақты бірінші ракетка Ига Швёнтек жеңіп алды. Польша өкілі бұл жолы да жарыстың басты фавориттерінің бірі саналады.
Индиан-Уэллс турниріне дейін Елена Рыбакина АҚШ-та өткен “Эйзенхауэр Кубогы” атты көрмелік турнирге қатысып, америкалық Тейлор Фритцпен жұптық сында жеңіске жетті.