«Аринаға қарсы батылырақ әрекет ету керек» — Рыбакина US Open финалындағы Соболенкомен кездесу туралы
Қазақстандық теннисші Елена Рыбакина US Open-2026 турнирінің беларусьтік Арина Соболенкоға қарсы финалдық матчын асыға күтетінін айтты, деп хабарлайды Sports24.kz.
Рыбакина америкалық Коко Гауффты жеңіп, турнирдің шешуші матчына жолдама алды. Ал Соболенко жартылай финалда тағы бір америкалық Джессика Пегуланы ұтты.
Финалға шыққаннан кейін Рыбакина болашақ қарсыласының жоғары деңгейін атап өтіп, Соболенкоға қарсы матчта агрессивті әрі сенімді ойнауы қажет екенін айтты.
«Арина — керемет ойыншы. Бүгін ол өте жақсы ойнады. Маған ойынымның деңгейін міндетті түрде көтеру керек болады, бүгінгіден әлдеқайда жақсы доп беруім, агрессивті болып, ойынды шиеленістіруім қажет. Әсіресе Аринаға қарсы матчтарда осындай мүмкіндік туындаған кезде батылырақ әрекет ету керек. Мен тек ойынымнан ләззат алуға тырысып жатырмын. Бастапқыда бұл турнирде ойнай алатыныма күмән болғанына қарамастан, мен турнирден барынша көп нәрсе алдым. Сондықтан тек өнер көрсетуімнен ләззат алуға тырысып жатырмын. Мұндағы атмосфера керемет», — деді Рыбакина Гауффпен матчтан кейін корттағы сұхбатында.
Еске салайық, US Open-2026 қорытындысы бойынша Рыбакина мансабында алғаш рет жаңартылған WTA рейтингінде бірінші орынға көтеріледі. Қазақстандық теннисші Соболенконы бірінші сатыдан ығыстырады.
