Тарихи жетістік: Михаил Шайдоров – мәнерлеп сырғанаудан әлем чемпионатының күміс жүлдегері
Қазақстандық мәнерлеп сырғанаушы Михаил Шайдоров Бостонда (АҚШ) өткен әлем чемпионатында керемет нәтиже көрсетіп, тарихи жетістікке қол жеткізді.
Спортшы күміс медаль жеңіп алып, бірден екі жеке рекордын жаңартты.
Қысқа бағдарлама қорытындысы бойынша Шайдоров үшінші орында тұрды, бірақ еркін бағдарламада өзінің нәтижесін жақсартып, жоғары көтерілді. Ол әсерлі өнер көрсетіп, төрешілерден 192,70 ұпай жинады – бұл оның мансабындағы ең жоғары көрсеткіш. Жалпы сомасы 287,47 ұпай жинаған Михаил алғаш рет ересектер арасындағы әлем чемпионатының жүлдегері атанды.
Әлем чемпионы атағын екінші жыл қатарынан америкалық Илья Малинин жеңіп алды – оның қорытынды нәтижесі 318,56 ұпай. Ал жапондық Юма Кагияма 278,19 ұпаймен қола жүлдені иеленді.
Бұған дейін Михаил жасөспірімдер арасындағы әлем чемпионатында күміс медаль алған, 2025 жылғы Азия ойындарында қола жүлдегер атанған, сондай-ақ Төрт құрлық чемпионатының жеңімпазы болған.
Бостондағы жоғары нәтижесінің арқасында Шайдоров 2026 жылғы Олимпиада ойындарына қатысуға қажетті нормативті орындады. Бұл жарыста үздік 24 спортшы ғана лицензияға ие болды. Енді қазақстандық мәнерлеп сырғанаушы төрт жылдықтың басты додасында ел намысын қорғайтын болады.