ҚР Туризм және спорт министрі Ербол Мырзабосынов шетелдік инвестормен кездесті
Қазақстан Республикасы Туризм және спорт министрі Ербол Мырзабосынов елордада Ұлттық спорт университетін салып жатқан швейцариялық Mabetex компаниясының басшылығымен маңызды кездесу өткізді. Жиын барысында тараптар жобаның қазіргі кезеңі, құрылыс жұмыстарының сапасы және университеттің болашақ инфрақұрылымын жан-жақты талқылады, деп хабарлайды спорт және туризм министірлігі.
Министр атап өткендей, бұл жобаның жүзеге асуы еліміздің спорттық білім беру жүйесін жаңғыртуға ықпал етіп, халықаралық деңгейдегі кәсіби мамандарды даярлауға мүмкіндік береді.
«Университет инфрақұрылымы тек білім беру мекемесі ретінде ғана емес, көпсалалы спорттық және ғылыми орталық ретінде де қызмет етеді. Бұл өз кезегінде еліміздегі туризм мен спорт саласының дамуына серпін беріп, өңірлік және халықаралық ынтымақтастықты нығайтуға мүмкіндік береді», – деді ҚР Туризм және спорт министрі Ербол Мырзабосынов.
Кездесуден кейін министр құрылыс барысымен танысып, жобаның бірінші және екінші кезеңдері бойынша жоспарлармен егжей-тегжейлі танысты. Ол құрылыс жұмыстарының сапалы әрі белгіленген мерзімде аяқталуының маңыздылығын ерекше атап өтті. Жоспарға сәйкес, жобаның алғашқы кезеңі мамыр айының соңында пайдалануға берілуі тиіс.
Қазіргі таңда бірінші кезең аясындағы жұмыстар аяқталуға жақын. Көпфункционалды спорт кешені, стадион, жеңіл атлетика манежі, жүзу бассейні, колледж ғимараты мен 500 орындық жатақхана мамыр айында қолданысқа берілмек. Бұл нысандар – оқу үдерісін бастап кетуге қажетті негізгі инфрақұрылымды құрайды.
Жоба толық жүзеге асқанда, университет спорт саласындағы кадрларды даярлаудың барлық деңгейін – колледжден бастап докторантураға дейін қамтитын кешенді жүйеге айналады. Мұнда бір мезгілде 2000-нан астам студент пен 60-қа жуық магистрант және докторант білім ала алады.
