Илфат Абдуллин Сингапурдегі Азия кубогында жеңісті жолын жалғастыруда
Қазақстандық садақ атушы Илфат Абдуллин Сингапурда өтіп жатқан Азия кубогының кезекті кезеңінде плей-оффтың екінші айналымынан сәтті өтіп, үшінші кезеңге жолдама алды.
Классикалық садақ атудан өткен іріктеу кезеңінде Абдуллин жоғары нәтиже көрсетіп, 681 ұпай жинады. Бұл көрсеткіш оған барлық қатысушылар арасында бірінші орынды қамтамасыз етті. Екінші және үшінші орындарды Қытай Тайбэйінің өкілі Тай-Ен Лю (672 ұпай) мен үндістандық Вишну Чаудхари (669 ұпай) иеленді.
Плей-оффтың екінші кезеңінде қазақстандық спортшы отандасы Даулеткелді Жанбырбаймен кездесіп, 6:2 есебімен жеңіске жетті.
Үшінші айналымда, яғни ширек финал жолдамасы үшін Илфат Моңғолиядан келген Дашнам Доржсуренмен күш сынасады. Қазақстандық мерген халықаралық ареналарда жоғары нәтижелер көрсетіп, ел намысын абыроймен қорғап келеді.