Геннадий Головкин 2025 жылғы Азия ойындарының жоғары деңгейде ұйымдастырылғанын атап өтті
Қазақстан Ұлттық Олимпиада комитетінің президенті Геннадий Головкин мен ҚР Туризм және спорт министрі Ербол Мырзабосынов қысқы Азия ойындары-2025 аясында Қытайдың спорт саласындағы басшысы Гао Чжиданмен кездесті.
Головкин жарысты ұйымдастыру деңгейіне жоғары баға беріп, ұйымдастырушыларға алғыс айтты.
“Мұндай ауқымды жарыстарды өткізу әрқашан оңай емес. Біз 2025 жылғы қысқы Азия ойындарының ұйымдастыру комитетіне қонақжайлылығы мен үйлесімді жұмысы үшін алғысымызды білдіреміз. Жарыстың алғашқы күндерінен бастап барлық процестердің жоғары деңгейде жүзеге асырылып жатқанын көріп отырмыз. Бұл логистикадан бастап техникалық қамтамасыз ету мен еріктілердің үйлесімді жұмысына дейін айқын байқалады”, – деп келтіреді Головкиннің сөзін Olympic.kz.
IX қысқы Азия ойындары 2025 жылы Харбинде 7-14 ақпан аралығында өтуде.
Қазіргі уақытта Қазақстан құрамасы 9 медаль жеңіп алды (1 алтын, 5 күміс және 3 қола) және жалпы есепте төртінші орында тұр. Көшбасшы орнында 54 жүлдесі бар Қытай құрамасы келеді.