Қазақстандық спортшы допингке байланысты Азия ойындарынан уақытша шеттетілді
Қазақстандық жеңіл атлет Аяна Болатбекқызы Айти мен Нагояда өтетін 2026 жылғы Азия ойындарына қатысудан уақытша шеттетілді. Оның допинг-сынамасынан тыйым салынған заттың бар екені бойынша қолайсыз аналитикалық нәтиже шықты, деп хабарлайды Sports24.kz.
Халықаралық тестілеу агенттігі қазақстандық жеңіл атлет Аяна Болатбекқызының антидопинг ережелерін бұзуы мүмкін екенін мәлімдеді. ITA дерегінше, спортшының сынамасынан дростанолон метаболитінің бар екені бойынша қолайсыз аналитикалық нәтиже алынған. Бұл зат арнайы көрсетілмеген тыйым салынған субстанцияларға жатады.
Аяна Болатбекқызы іс бойынша хабардар етіліп, ресми тергеу аяқталғанға дейін бірден уақытша шеттетілді. Бұл шешім Дүниежүзілік антидопинг кодексі мен Азия Олимпиада кеңесінің антидопинг ережелеріне сәйкес қабылданды. Шеттетілу кезеңінде спортшыға жарыстарға қатысуға, жаттығуға, жаттықтырушылық қызметпен айналысуға немесе Айти–Нагоя 2026 Азия ойындарының іс-шараларына кез келген басқа жолмен қатысуға тыйым салынады.
Халықаралық тестілеу агенттігінің мәліметінше, сынама 27 қыркүйекте Нагояда алынған. Бақылау жарыс кезінде жүргізілген. Қазақстандық 19 жастағы желаяқтың сынамасынан дростанолон метаболиті анықталған.
2026 жылғы Азия ойындарында Аяна Болатбекқызы екі тәртіп бойынша өнер көрсетті. 26 қыркүйекте қазақстандық жеңіл атлет әйелдер арасындағы 1500 метрге жүгіру финалына қатысып, 10-орын алды. Келесі күні ол 800 метр қашықтыққа жүгірудегі іріктеу кезеңінде стартқа шығып, 12-нәтиже көрсетті және жарыстың финалдық кезеңіне өте алмады.
Қазіргі кезеңде Болатбекқызының уақытша шеттетілуі алдын ала қабылданған шара болып табылады. Спортшы B допинг-сынамасын ашып, талдауды талап етуге құқылы. Сондай-ақ ол Спорттық арбитраж сотының Антидопинг бөліміне уақытша шеттетілуге қатысты шағым түсіре алады. Рәсім аяқталғанға дейін іс бойынша түпкілікті шешім қабылданған жоқ.
Егер ереже бұзушылық расталса, Болатбекқызы антидопинг ережелеріне сәйкес санкцияларға тап болуы мүмкін. Ал B сынамасы немесе кейінгі тергеу жағдайды өзгертсе, уақытша шеттету қайта қаралуы ықтимал. Әзірге қазақстандық жеңіл атлетке Азия ойындарының іс-шараларына қатысуға рұқсат жоқ.
Еске сала кетейік, бұған дейін 2026 жылғы Азия ойындарындағы марафондық спорттық жүрісте қазақстандық Ясмина Тоқсанбаева алтын медалінен айырылған еді.
