Қазақстан мен Вьетнам 2027 жылға дейін спорт саласындағы әріптестікті дамытуға келісті
Қазақстан мен Вьетнам спорт саласындағы ынтымақтастықты нығайту жөнінде келісімге келді.
Бұл туралы ҚР Туризм және спорт министрлігінің баспасөз қызметі хабарлады.
Меморандум Қазақстан Республикасының Президенті Қасым-Жомарт Тоқаев пен Вьетнам Коммунистік партиясы Орталық комитетінің Бас хатшысы То Лам арасындағы ресми келіссөздер барысында мақұлданды. Құжат 2025 жылдан 2027 жылға дейінгі кезеңді қамтиды және ҚР Туризм және спорт министрлігі мен Вьетнамның Мәдениет, спорт және туризм министрлігі арасындағы ынтымақтастықты көздейді.
Келісім аясында тараптар спорт саласындағы тәжірибе және өзекті ақпарат алмасуды, екі ел үшін басым бағыттардағы спорт түрлерін дамытуға қолдау көрсетуді, сондай-ақ допингке қарсы күресте бірлесе әрекет етуді жоспарлап отыр.
Бірлескен жобаларды жүзеге асыру тәртібі, қаржыландыру механизмдері мен тараптардың құқықтары мен міндеттері қосымша келісімдер арқылы нақтыланатын болады. Меморандум бес жыл мерзімге жасалып, екі жақтың келісімі бойынша ұзартылуы мүмкін.