Алматы облысының дене шынықтыру және спорт басқармасының экс-басшысы пара алды деген күдікке ілінді
Алматы қаласы бойынша Сыбайлас жемқорлыққа қарсы қызмет Алматы облысының дене шынықтыру және спорт басқармасының бұрынғы басшысы пара алды деген күдікке ілінгенін хабарлады.
Антикордың мәліметінше, ол Республикалық спортқа дарынды балаларға арналған мектеп-интернат колледжінің директоры бола отырып, жеке кәсіпкермен мемлекеттік сатып алу шартына отыру үшін 8 миллион теңге көлемінде пара алды деп күдіктелуде. Бұл сома мектепке азық-түлік жеткізу қызметіне қатысты шартпен байланысты болған.
2025 жылдың 24 сәуірінде тергеу сотының санкциясымен күдікті қамауға алынды. Қазіргі таңда тергеу амалдары жалғасуда.
Қылмыстық-процестік кодекстің 201-бабына сәйкес, тергеу мүддесі үшін өзге мәліметтер жария етуге жатпайды.
Қазақстан Республикасы Конституциясының 77-бабы 3-тармағының 1-тармақшасына және Қылмыстық-процестік кодекстің 19-бабы 1-бөліміне сәйкес, адамның кінәсіздігі соттың заңды күшіне енген үкімімен дәлелденбейінше, ол кінәсіз деп есептеледі.