UFC екі титулдық жекпе-жекті ресми түрде жариялады
UFC басшылығы 2027 жылғы 30 қаңтарда Торонтода өтетін UFC 336 турниріне арналған екі титулдық жекпе-жекті бекітті. Жеңіл салмақтағы қазіргі чемпион Джошуа Ван октагонға қайта оралады, ал жеңіліп көрмеген эквадорлық Майкл Моралес жартылай орта салмақтағы уақытша чемпиондық белбеу үшін бақ сынайды, деп хабарлайды Sports24.kz.
UFC 336 турнирінің басты оқиғаларының бірі жеңіл салмақтағы титулдық жекпе-жек болмақ. Ұйымның қазіргі чемпионы, Мьянма атынан шығатын Джошуа Ван Манель Капемен кездеседі. Ангола текті португалиялық файтер UFC чемпиондық белбеуін жеңіп алу мүмкіндігіне ие болады. Ван үшін алдағы жекпе-жек чемпион мәртебесіндегі кезекті сынақ болмақ, ал Капе дивизионның жаңа чемпионы атануға тырысады.
Турнирдің тағы бір маңызды жекпе-жегі жартылай орта салмақта өтеді. Жеңіліп көрмеген эквадорлық файтер Майкл Моралес Бразилия өкілі Карлос Пратеспен кездеседі. Бұл айқаста UFC-дің жартылай орта салмақтағы уақытша чемпионы атағы сарапқа салынады. Осылайша, қарсыласын жеңген спортшы уақытша чемпиондық белбеуге ие болып, салмақтағы үздік файтерлер арасындағы позициясын нығайтады.
Кәсіби мансабында жеңіліс көрмеген Моралестің жекпе-жекке қатысуы ерекше назар аудартады. Оның қарсыласы нокауттық соққыларымен танымал Карлос Пратес болады.
Бұған дейін Карлос Пратес жартылай орта салмақтағы қазіргі чемпион Ислам Махачевтің ықтимал қарсыласы ретінде қарастырылған еді. Олардың жекпе-жегі Торонтодағы UFC 336 турнирінің басты айқасы болады деп болжанған.
Алайда кейін ресейлік чемпионның ықтимал жарақаты және промоушен жоспарларының өзгергені туралы ақпарат тарады. Енді Пратестің Майкл Моралеспен уақытша чемпиондық белбеу үшін өтетін жекпе-жегі ресми түрде бекітілді.
Еске сала кетейік, UFC 336 турнирі 2027 жылғы 30 қаңтарда өтеді. Жарыс Торонтодағы Scotiabank Arena аренасында ұйымдастырылады.
