Қуат Хамитов Қазақстан футболшыларына \"сәлем жолдады\"
Қазақстандық ММА жекпе-жекшісі Қуат Хамитов отандық футболға деген сыншыл көзқарасын тағы да еске салды. Спортшы жекпе-жектің үзіндісін жариялап, оған: «Көшеде футболшыларды кездестіргенде» деп жазба қалдырды, деп хабарлайды Sports24.kz.
Қуат Хамитов әлеуметтік желіде жариялаған жазбасымен тағы да көпшіліктің назарын өзіне аударды. Бұл жолы қазақстандық жекпе-жекші октагондағы жекпе-жектен бір сәтті бейнежазба түрінде жариялап, оған футболшыларға арналған арандатушы жазба қосты.
Хамитовтың қазақстандық футболға деген көзқарасын бейтарап деу қиын. Ол бұған дейін де футболдағы ахуал, жергілікті ойыншылардың деңгейі мен клубтарды қаржыландыру туралы өткір пікірлер айтқан.
Ең дауалы оқиғалардың бірі ұлттық құраманың сәтсіз ойынынан кейін орын алған еді. Сол кезде Хамитов Қазақстан футболын түбегейлі "жабуды" талап етіп, бұл спорттық ортада үлкен дау тудырған болатын.
Кейіннен ол футболшыларды мемлекеттік қаржыландырудан бас тартуға шақырды. Бұл жолғы өткір мәлімдемеге Қазақстан құрамасының Словениядан жеңілуі түрткі болған. Сонда Хамитов ойыншыларға «халықты тонауды доғарыңдар» деп үндеу тастаған еді.
Қуат Хамитов — ММА-дағы ең танымал қазақстандық спортшылардың бірі. Ол тек жекпе-жек қана емес, қоғамдағы өзекті спорттық мәселелер жөнінде де жиі пікір білдіреді. Оның қазақстандық футболға бағытталған сыны жанкүйерлер, спортшылар және медиа арасында талай рет қызу талқыға түскен. Бұл жолғы футболшыларға арналған жазбасы да Хамитов пен отандық футбол арасындағы ескі қарсыластықтың жалғасы іспетті.