Шақыру қабылдана ма? Рахмоновтың бапкері Брэдидің сөзі мен мүмкін жекпе-жек жайлы
Шақыру қабылдана ма? Рахмоновтың жаттықтырушысы – Брэдидің сөзі мен мүмкін жекпе-жек жайлы
UFC әлемінде Шавкат Рахмонов жайлы қайта әңгіме қозғалды. Бұл жолы қазақстандық жұлдызға назар аудартқан – жартылай орта салмақтағы рейтингтің екінші нөмірі Шон Брэди. Ол ашық түрде Рахмоновпен Нью-Йоркте өтетін UFC 322 турнирінде кездескісі келетінін мәлімдеді.
DAR Team бас бапкері Эдуард Базров бұл шақыруға байыппен қарады:
«Брэди рейтингте жоғары орында тұр және мұндай жекпе-жекке үміткер болуға толық құқығы бар. Біз қазір жағдайдың қалай өрбитінін бақылап отырмыз. Келесі жекпе-жекті өткізгіміз келеді, бірақ әзірге нақты қарсылас пен күн белгіленген жоқ»,-деді ол.
Рахмонов соңғы рет октагонға 2024 жылдың желтоқсанында шығып, Иэн Гэрриді айқын басымдықпен жеңген еді. Бұған дейін өзі қараша айында қайта жекпе-жек өткізуге дайын екенін айтқан болатын. Алайда биыл шілде айында оның отбасында қайғылы жағдай болды – жұбайы Гүлайым Рахмонова қатысқан жол апатында жолаушылар қаза тапты. Осы себепті Шавкат уақытша үзіліс алып, назарын отбасына аударды.