«Рахмоновты қалай жеңуді білемін». UFC чемпионы Шавкатқа ашық шақыру тастады
UFC-дің жартылай орта салмақтағы чемпионы Джек Делла Маддалена алдағы жоспарларымен бөлісіп, келесі қарсыласы ретінде Қазақстанның топ-жартылай орта салмақ жұлдызы Шавкат Рахмоновты көретінін айтты.
Қазіргі сәтте аустралиялық файтер Ислам Махачевке қарсы жекпе-жекке дайындалып жатыр. Бұл айқас 16 қараша күні Нью-Йоркте өтетін UFC 322 турнирінің басты жекпе-жегі болмақ. Алайда Маддалена ойында келесі қадамды да анық көріп отыр.
«Әр жекпе-жек тәжірибе береді. Иә, Исламға қарсы айқас мені Шавкатқа да дайындайды. Екеуі әртүрлі: Рахмонов биік, күші басым. Шавкатты UFC-ге алғаш келген кезінен бақылап жүрдім. Оның бұл жерде үстемдік құра алатынын бірден түсіндім. Біздің жолдарымыздың түйісетініне сендім. Менде оны жеңуге мүмкіндік беретін дағдылар бар. Ол келесі қарсыласым болады деп үміттенемін. Бірақ алдымен - Ислам», - деді Маддалена Исраэль Адесаньяның подкастында.
Айта кетейік, Маддалена биыл мамырда күтпеген жерден Белал Мухаммадтан чемпиондық белбеуді тартып алған болатын.
Ал сол кезде бастапқы жоспар бойынша Белал Шавкатпен жұдырықтасуы тиіс еді, бірақ Рахмонов жарақат алып, жекпе-жектен бас тартуға мәжбүр болды. Осылайша, қарсылас ауысып, Маддалена титулға мүмкіндік алды.