Нұрғожай UFC-тен бонус алды: қазақстандық Катардағы нокауты үшін қанша табыс тапты
Қазақстандық файтер Дияр Нұрғожай әлемдегі ең мықты ММА промоушеніндегі жеңіс сериясын жалғастырып қана қоймай, Дохада өткен UFC Fight Night 294 турнирінде жекпе-жекті әсерлі аяқтағаны үшін қомақты сыйақыға ие болды, деп хабарлайды Sports24.kz.
Дияр Нұрғожайдың Катар астанасындағы өнері UFC Fight Night 294 турнирінің ең жарқын сәттерінің бірі болды. Қазақстандық жартылай ауыр салмақтағы файтер америкалық Алик Лоренцті мерзімінен бұрын жеңіп, кейін ұйымдастырушылардың 100 мың доллар көлеміндегі арнайы бонусына ие болды.
Нұрғожай «Кештің үздік өнері» аталымы бойынша марапат алды. Осылайша, жеңіс оған октагондағы кезекті табыспен қатар қосымша ақшалай сыйақы да әкелді.
Қазақстандықтың қарсыласы америкалық Алик Лоренц болды. Ол үшін Дохадағы кездесу UFC аясындағы дебют еді. Жекпе-жек үш раундқа жоспарланғанымен, төрешілердің шешіміне дейін созылмады. Шешуші сәт екінші раунд бастала салысымен болды. Нұрғожай баспен дәл соққы жасап, америкалықты нокдаунға түсірді. Қазақстандық бірден басымдықты жалғастырып, партерде қарсыласына соққылар сериясын жаудырды.
Төреші араласып, екінші раундтың 24-секундында жекпе-жекті тоқтатты. Нұрғожайдың техникалық нокаутпен жеңісі тіркелді.
Мұндай әсерлі аяқталу UFC басшылығының назарынан тыс қалмады. Қазақстандық кеш қорытындысы бойынша ақшалай бонус алған төрт файтердің қатарына енді.
Дияр Нұрғожайдан бөлек, турнирдің үздік өнері үшін тағы үш қатысушы марапатталды.

UFC Fight Night 294 турниріндегі «Кештің үздік өнері» бонусының иегерлері:
• Дияр Нұрғожай - 100 000 доллар.
• Навахо Стирлинг - 100 000 доллар.
• Амир Альбази - 100 000 доллар.
• Джон Митчелл - 100 000 доллар.
Төртеуі де Дохадағы өнері үшін бірдей сыйақы алды.
Катардағы жеңіс Нұрғожайға UFC-дегі жеңіс сериясын жалғастыруға мүмкіндік берді. Лоренцпен кездескенге дейін қазақстандық жартылай ауыр салмақтағы файтер қатарынан екі жеңіске жеткен еді, әрі ол жеңістерге әртүрлі жолмен қол жеткізді. Алдымен Дияр Рафаэль Тобиастан басым түсіп, төрешілердің бірауыздан шығарған шешімімен жеңіске жетті. Одан кейін соққы техникасын паш етіп, Бруно Лопесті нокаутқа түсірді.
Дохада Нұрғожай жекпе-жекті тағы да мерзімінен бұрын аяқтап, жеңіс сериясын үш кездесуге жеткізді.
Енді оның кәсіби рекорды — 13 жеңіс, 2 жеңіліс. Ал UFC-дегі көрсеткіші — 3–2.
Айта кетерлігі, осы сәтті серияға дейін қазақстандық қатарынан екі рет жеңіліп қалған еді. Алайда кейінгі өнерлері жағдайды өзгертіп, әлемдегі ең мықты промоушендегі оң қарқынын нығайтуға мүмкіндік берді.