Мэнни Пакьяо мен Конор Макгрегор 2025 жылдың жазында Ресейде кездесу өткізуі мүмкін
45 жастағы филиппиндік боксшы, сегіз салмақ дәрежесінде әлем чемпионы атанған аңызға айналған Мэнни Пакьяо мен 36 жастағы ирландиялық UFC-дің екі салмақтағы экс-чемпионы Конор Макгрегор 2025 жылдың жазында Ресейде жекпе-жек өткізуі мүмкін. Бұл туралы Mash хабарлады.
Ақпарат көзінің мәліметінше, Пакьяо мен Макгрегор арасындағы жекпе-жек “IBA чемпиондар түні” турнирлер сериясының басты оқиғасы болуы ықтимал. Сонымен қатар, қос тараптың өкілдерімен келіссөздер басталып кеткені туралы да айтылған. Болжам бойынша, бұл кездесу көрме жекпе-жегі форматында өтеді.
Айта кетейік, Конор Макгрегор ММА-дегі соңғы ресми жекпе-жегін 2021 жылдың шілдесінде өткізіп, Дастин Порьеге техникалық нокаутпен есе жіберген. Сол жылы Мэнни Пакьяо да өз мансабындағы соңғы кәсіби жекпе-жегін өткізіп, кубалық Йорденис Угасқа төрешілердің бірауыздан шешімімен жеңіліп қалған болатын.