Двалишвили қарсыласы Нурмагомедовты жеңіп, UFC чемпионы атағын қорғады
19 қаңтарда Лос-Анджелестегі (АҚШ) "Интьют Доум" аренасында UFC 311 турнирі өтті. Турнирдің басты жекпе-жектерінің бірі ретінде жеңіл салмақтағы (61,2 кг дейін) чемпион грузиялық Мераб Двалишвили (19-4) мен ресейлік Умар Нурмагомедов (18-1) кездесті. Жекпе-жек толық бес раундқа созылып, төрешілердің бірауыздан қабылдаған шешімімен қазіргі чемпионның жеңісімен аяқталды.
Бұл Нурмагомедовтың кәсіби мансабындағы алғашқы жеңілісі болды. Ал Мераб өзінің жеңісті сериясын 12 жекпе-жекке дейін ұлғайтып, чемпиондық белбеуін сәтті қорғады.
Алғашқы раундтарда екі спортшы алыс қашықтықты сақтап, бір-бірін зерттеп, финттермен шектелді. Бірақ уақыт өткен сайын жекпе-жек қарқыны күшейе түсті. Двалишвили үміткерге қысым жасап, оны қорғануға мәжбүрлей бастады. Умар партерге түсіру әрекеттерінің көпшілігін сәтті қайтарды.
Үшінші раундта Мерабтың табандылығы өз жемісін берді. Чемпион Умарды партерге түсіре алды, бірақ үміткер тез көтерілді. Дегенмен, осы сәттен бастап грузин спортшысы стойкада басымдық көрсете бастады. Двалишвили бірнеше рет тейкдаун жасауға тырысты, қарсыласының бір аяғынан ұстады. Умар мықты қорғаныс көрсеткенімен, чемпион бірнеше сәтті әрекетпен өз артықшылығын арттырды.
Төртінші және бесінші раундтарда Умардың шаршағаны анық байқалды, ал Мераб өзінің қарқынын арттыруды жалғастырды. Жекпе-жек соңында чемпион тағы бірнеше тейкдаун жасап, өз басымдығын нығайтты. Төрешілер жекпе-жекті 48-47, 48-47 және 49-46 есебімен бірауыздан Мераб Двалишвилиге берді.