Александр Овечкин өзінің хоккейдегі болашағы неге байланысты екенін айтты
«Вашингтон Кэпиталз» капитаны Александр Овечкин мансабын аяқтау туралы шешім келісімшартқа емес, өзінің физикалық жағдайына байланысты болатынын ашық айтты.
ESPN мәліметінше, осы маусым клубпен жасалған қазіргі келісім бойынша 40 жастағы хоккейші үшін соңғысы болуы мүмкін.
«Менің ойымша, бәрі денсаулыққа байланысты. Хоккейден кейін балаларыммен бірге футбол ойнауға немесе мұз үстінде сырғанауға шамам келмейтін күйге жеткім келмейді. Қазір әр сәтті бағалап, жанкүйерлерден қуат алып, ойынды ләззатпен өткізуге тырысамын», — деді Овечкин.
Шабуылшы бір клубта осыншама жыл ойнау – үлкен бақыт екенін атап өтті:
«Бүкіл мансабымды «Вашингтон» сапында өткізу бақыты бұйырды. Хоккейге деген сүйіспеншілігім, құштарлығым бұрынғыша. Барынша рахат алуға тырысамын, себебі қашан жарақат алатыныңды немесе қоштасатын сәттің келетінін ешқашан білмейсің».
Ағымдағы маусым Александр Овечкин үшін НХЛ-дегі 21-ші маусым болды — бұл ресейлік ойыншылар арасында абсолютті рекорд. Бұған дейін 20 маусымдық межені тек Евгений Малкин мен Сергей Гончар ғана еңсерген болатын.