Қазақстан құрамасы әлем чемпионатына іріктеудегі алғашқы қарсыластарын білді
19 маусымда УЕФА-ның штаб-пәтерінде футзалдан әлем чемпионатына іріктеудің негізгі кезеңінің жеребесі тартылды. Бұл рәсімде Қазақстан құрамасы да өз қарсыластарын білді, деп хабарлайды Sports24.kz.
Жеребе қорытындысы бойынша Какау шәкірттері Беларусь және Албания құрамаларымен күш сынасады. Қазақстан бұл командалардың әрқайсысымен екі реттен — өз алаңында және сырт алаңда, 2026 жылдың қазан, қараша, желтоқсан айларында кездеседі.
Айта кетейік, негізгі кезеңде тек элиталық раундқа жолдамалар сарапқа салынады. Тікелей элиталық раундқа өту үшін топты бірінші орынмен аяқтау немесе екінші орын алған үздік төрт команданың қатарына кіру қажет.
- Сондай-ақ оқыңыз: Қазақстан құрамасы Бразилия және Франциямен бір турнирде ойнайды
Екінші орын алған қалған сегіз команда элиталық раундқа төрт жолдаманы плей-офф кезеңінде сарапқа салады. Іріктеудің соңғы сатысында 20 команда бес топқа бөлінеді, әр топта төрт командадан болады.
Әлем чемпионатына тек топ жеңімпаздары тікелей жолдама алады, ал екінші орын алған үздік төрт команда плей-офф кезеңіне өтеді.
