Ювентус аңызы Моттаның орнына Конте келгенін талап етті
Леонардо Бонуччи "Ювентустің" "Аталантадан" 0:4 есебімен жеңілуін сынға алып, бұл күнді клуб үшін "қасіретті" деп атады.
Оның айтуынша, мұндай нәтиже командаға ауыр соққы болды, ал Тьяго Моттаның тек көңілсіздік пен реніш білдіруі жеткіліксіз.
Бонуччидің ойынша, "Ювентус" нақты мақсаттарын айқындауы керек. Егер клуб тез арада жеңіске жетуді көздесе, жазда Антонио Контені шақыру қажет. Ал егер ұзақ мерзімді жоспар құру маңызды болса, Мотта мен спорт директоры Кристиано Джунтолиге уақыт беру керек.
Қазір команда қиын кезеңді бастан өткеруде: "Юве" Чемпиондар лигасы мен Италия кубогынан шығып қалды, ал енді Серия А-ның үздік төрттігіне кіру үшін күресуде. Осы жағдайға байланысты Моттаға сын көбейіп келеді.
Келесі матчта туриндік клуб "Фиорентинаға" қарсы ойнайды, онда олар бұл ауыр жеңілістен кейін өз беделін қайтаруға тырысады.
Айта кетейік, Леонардо Бонуччи "Ювентус" сапында 502 матч өткізіп, 37 гол соғып, 10 нәтижелі пас берген. Ол клубпен бірге 20 трофей жеңіп алып, 2024 жылы карьерасын аяқтаған.
