Ямаль неліктен «Алтын допты» иелене алмады? Мұны France Football басшысы түсіндірді
France Football бас редакторы әрі «Алтын доп» жүлдесінің жетекшісі Венсан Гарсия «Барселона» мен Испания құрамасының қанат шабуылшысы Ламин Ямальдың жүлдені жеңе алмауына клубы мен ұлттық құрамадағы әріптесі Родридің оның дауыстарының бір бөлігін «тартып алуы» себеп болуы мүмкін екенін айтты, деп хабарлайды Sports24.kz.
Жеңімпаз атанған ағылшын Гарри Кейн бірінші орынға ие болды, Ямаль үшінші, ал Родри төртінші орын алды.
«Әлем чемпионы атанған Испания құрамасының ішінде дауыстар Родри мен Ламин Ямаль арасында бөлініп кеткен деп ойлаймын. Дауыс беру кезінде Родри Ламинге бұйыруы мүмкін болған дауыстардың бір бөлігін өзіне «тартып алды» деп есептеймін. Испаниялық ойыншыларға берілген дауыстар біршама «шашырап» кетті, оның үстіне Испания құрамасы біртұтас ұжым ретінде өнер көрсетті. Сондықтан қандай да бір жеке жетістікті бөліп көрсету қиын болды», — деп Гарсияның сөзін келтіреді Sport.es.
Оның айтуынша, Ямаль әлем чемпионы атанғанымен, небәрі бір гол соққан, сонымен қатар турнирді жарақатпен бастаған.
«Қазылар алқасының мүшелеріне испаниялық футболшылардың бірін таңдау оңай болған жоқ. Мен жеңіске жетпеген ойыншыға дауыс бердім — дегенмен, меніңше, ол да жүлдеге лайық еді. Бірақ бұл туралы сенбі күні білесіздер. Гарри Кейнге келсек, ең алдымен, ол — шын мәнінде ұлы сұрмерген. Қазылар алқасының мүшелері барлық үміткерлердің арасынан дәл оның ең үздік қасиеттер үйлесімін көрсеткенін есептеген шығар», — деп қорытындылады ол.
«Алтын доп» жүлдесін француздың France Football журналы жыл сайын күнтізбелік жылдағы ең үздік футболшыға табыстайды. Биылғы дауыс беруде екінші орын «Реал» сапындағы француз Килиан Мбаппеге бұйырды. Үшінші орын — испаниялық Ламин Ямальда («Барселона»).
