Виктор Кумыков: Мамыр айы қиын болады – «Қайсарды» алда бес ойын күтіп тұр
Қызылордалық «Қайсар» футбол клубының бас бапкері Виктор Кумыков 2025 жылғы маусым аясындағы Қазақстан Премьер-лигасындағы мамыр айындағы алдағы ойындар туралы пікір білдірді.
Оның айтуынша, «қасқырларды» өте қарқынды және күрделі кезең күтіп тұр – бір айдың ішінде бес кездесу өткізіледі.
«Дайындықты бастап кеттік. Мамыр оңай ай болмайды – бес матч күтіп тұр. Алдағы қарсылас – «Ордабасы». «Астанаға» қарсы өткен соңғы ойында жігіттерге ешқандай ренішім жоқ. Жігер, өздерін аямау – бәрі жоғары деңгейде болды. Жеңіске жетуіміз де мүмкін еді, бірақ болмады. Осындай қарқынмен ойнай берсек, нәтиже де келеді», – деп Кумыковтың сөзін клубтың баспасөз қызметі келтіреді.
Айта кетейік, ҚПЛ-дың жетінші турында «Қайсар» өз алаңында «Астанамен» 1:1 есебімен тең ойнады. Келесі кездесу 11 мамыр күні сырт алаңда «Ордабасыға» қарсы өтеді.
Қазіргі уақытта Кумыков шәкірттері турнирлік кестеде жеті турдан кейін 4 ұпай жинап, 11-орында тұр.
