УЕФА төбелестен кейін Чемпиондар лигасындағы матч бойынша тергеу бастады
Еуропалық футбол қауымдастықтары одағы (УЕФА) түркиялық «Фенербахче» клубына, сондай-ақ футболшылар Маттео Гендузи мен Мейсон Гринвудқа қатысты Чемпиондар лигасының плей-офф кезеңіндегі француздың «Лион» командасына қарсы қарымта матчтан кейін тәртіптік тергеу бастады, деп хабарлайды Sports24.kz.
Бұл туралы клубтың X әлеуметтік желісіндегі баспасөз қызметі мәлімдеді.
«Фенербахче» 26 тамызда сырт алаңда «Лионды» 2:1 есебімен жеңіп, Чемпиондар лигасының негізгі кезеңіне жолдама алды.
Бірқатар БАҚ-тың мәліметінше, матчтан кейін Гендузи алаң иелерінің жанкүйерлеріне Марсельмен байланысты француз рэпері Jul-дің ишарасын көрсетіп, бұған дейін өзі ойнаған «Лионның» принципті қарсыласы — «Марсельді» қолдайтын ұран айтқан. Гендузи трибуна астындағы бөлмеге қарай бет алған кезде тоннельдің кіреберісінде тұрған «Лион» қақпашыларының жаттықтырушысы футболшыға тап берген. Осыдан кейін жаппай төбелес басталған.
«Чемпиондар лигасының плей-офф кезеңіндегі қарымта матчтан кейін УЕФА футболшылар Маттео Гендузи мен Мейсон Гринвудқа, сондай-ақ біздің клубқа қатысты тәртіптік іс қозғады. Клубымыз бұл процесс аясында қажетті түсініктемелер беріп, УЕФА-ның тиісті органдары алдында футболшылар мен «Фенербахченің» құқықтары мен мүдделерін қорғайды», — делінген мәлімдемеде.
«Фенербахче» екі матчтың қорытындысы бойынша «Лионды» 3:2 есебімен жеңіп, 17 жылдан кейін алғаш рет Чемпиондар лигасының негізгі кезеңінде ойнайды.
