Трансфер үшін бунт: Исак пен «Ньюкасл» арасындағы жанжал немен аяқталады?
«Ньюкасл Юнайтед» клубы ресми түрде мәлімдеп, Александр Исактың бұл жазда команданы тастап кетпейтінін хабарлады.
Бұл түсіндірме швед шабуылшысының әлеуметтік желідегі жазбасынан кейін жасалды. Ол онда клуб басшылығын уәделерін орындамады деп айыптаған болатын.
Мәлімдемеде атап өтілгендей, Исактың қолданыстағы келісімшарты бар және оның сатылатыны жөнінде ешқашан кепілдік берілмеген. Клуб басшылығы:
«Біз үздік ойыншыларымызды сақтауға тырысамыз, дегенмен футболшылардың өз армандары бар екенін түсінеміз. Бірақ біздің басты мақсатымыз – клубтың, команданың және жанкүйерлердің мүдделерін қорғау. Қазіргі жазғы трансферлік терезеде келісім үшін жағдай жоқ және ол орындалмайды деп күтеміз», – деп мәлімдеді.
Сонымен қатар «Ньюкасл» Исактың команданың бөлігі болып қала беретінін айтты:
«Біздің клуб дәстүрімен мақтанады және отбасылық атмосфераны сақтауға ұмтылады. Алекс – осы отбасының бір бөлігі, ол қайта оралған кезде командаластары жылы қарсы алады».
БАҚ-тың хабарлауынша, Исак жағдайға қатты наразы. Ол «Ливерпульге» ауысқысы келген, мерсисайдтық клуб оған 120 млн фунт ұсынған. Алайда «сорғалар» 150 млн талап еткен. Соның салдарынан 25 жастағы шабуылшы жаттығуларға қатысудан бас тартты. Клуб әр өткізіп алған ресми матч үшін айыппұл салуды жоспарлап отыр, тіпті оны екінші командаға жіберуі мүмкін.
Айта кетейік, Исак 2022 жылдың жазында «Реал Сосьедадтан» «Ньюкаслға» 70 млн еуроға ауысқан. Оның келісімшарты 2028 жылдың маусымына дейін күшінде, ал Transfermarkt порталы футболшының нарықтық құнын 120 млн еуроға бағалап отыр.
