Тек «Челси» емес: үш үздік еуропалық лиганың клубтары Сатпаевты өз қатарына алғысы келді
Үш еуропалық топ-лиганың клубтары «Қайраттың» шабуылшысы Дастан Сатпаевты өз құрамына қосуға қызығушылық танытқан еді, бірақ ол ақыры «Челсиді» таңдады. Бұл туралы агент Герман Ткаченко мәлімдеді.
«Сатпаевқа Англияның өзге клубтары ғана емес, Испания мен Италия командалары да қызығушылық танытты. Ресейлік клубтар да назар аударды, бірақ ол ақырында «Челсиді» таңдады.
Әлемнің әр түкпірінен талантты футболшылар табылады. Хвича Кварацхелия мен Абдуқодир Хусанов – посткеңестік кеңістіктен шыққан екі мысал ғана. Бірі Чемпиондар лигасын жеңіп алды, ал екіншісі Пеп Гвардиола жаттықтыратын «Манчестер Сити» сапында ойнап жүр», – деп келтіреді агенттің сөзін Transfermarkt.
Сатпаев 2026 жылдың жазында 18 жасқа толған соң «Челси» лагеріне қосылады. Лондондық клуб пен «Қайрат» арасындағы келісімшарттың құны 2,4 миллион еуроны құрайды.
Бұған дейін Дастанды аңызға айналған «Манчестер Сити» шабуылшысымен салыстырған болатын.
