Тартысты тең ойын. «Қайрат» пен «Олимпия» бәрін Алматыда шешеді
8 шілде күні Любляна қаласында УЕФА Чемпиондар лигасының алғашқы іріктеу кезеңі аясындағы алғашқы кездесу өтті. Бұл ойында алматылық «Қайрат» Словенияның «Олимпия» клубымен сырт алаңда тең ойнады – 1:1.
Кездесудің 59-минутында алматылық команданың 16 жастағы жас шабуылшысы Дастан Сәтпаев есеп ашты. «Қайраттың» талантты вундеркинді шабуыл сәтін тиімді пайдаланып, допты қарсылас қақпасына дәл бағыттады. Бұл - оның Еурокубоктардағы алғашқы голы.
Алайда көп ұзамай алаң иелері есепті теңестірді. 66-минутта «Олимпия» ойыншысы Диогу Пинту мергендік танытып, таразы басын теңестірді.
Чемпиондар лигасы. 1-іріктеу кезеңі. Алғашқы матч
«Олимпия» (Словения) — «Қайрат» (Қазақстан) — 1:1 (0:0)
Голдар: Диогу Пинту, 66 – Дастан Сәтпаев, 59
Осылайша, екі команда алғашқы ойында жеңімпазды анықтай алған жоқ. Жауапты матч 15 шілде күні Алматыда өтеді. Дәл сол кездесуде қай клубтың келесі кезеңге жолдама алатыны белгілі болады.
