Сатпаев алаңға шыға ма? «Бернли» - «Чарльтон»: қайдан көруге болады, болжамды құрам
Қазақстан құрамасының шабуылшысы Дастан Сатпаев өнер көрсететін ағылшындық «Бернли» Чемпионшиптің оныншы турында өз алаңында «Чарльтонды» қабылдайды, деп хабарлайды Sports24.kz.
Кездесу 13 қазанда «Терф Мур» стадионында өтеді. Матч Қазақстан уақытымен сағат 23:45-те басталады. Ойынның тікелей трансляциясын мына сілтеме арқылы көруге болады.
Тоғыз турдан кейін «Бернли» жеті ұпай жинап, осы маусымдағы алғашқы жеңісіне қол жеткізді. Алдыңғы кездесуде команда сырт алаңда «Уотфордты» 4:0 есебімен ойсырата жеңді.
«Чарльтон» соңғы турда «Бристоль Ситимен» 1:1 есебімен тең түсті. Команданың еншісінде 13 ұпай бар.
Болжамды құрам
Flashscore порталы «Бернлидің» алдағы матчқа арналған болжамды құрамын жариялады. Дастан Сатпаев негізгі құрамға енбеген.
Кудер; Уокер, Ахмедходжич, Игор Жулио, Лукас Пирес; Хатате, Аллейн, Лорент; Рамазани, Ларсен, Амдуни.
Бұған дейін, 10 қазан, сенбі күні «Бернли» Англия чемпионаты аясында сырт алаңда «Уотфордты» 4:0 есебімен жеңді.
Бұл жеңіс команданың турнир кестесіндегі соңғы орыннан көтерілуіне мүмкіндік берді. Сонымен қатар клуб ақпан айынан бері алғаш рет бір матчта үш ұпай жинады. «Бернли» 241 күн бойы жеңіске жете алмаған еді.
Еске салайық, сол кездесуде 18 жастағы қазақстандық шабуылшы Дастан Сатпаев алаңға қосалқы құрамнан шығып, шамамен 20 минут ойнады. Бұған дейін ол санның артқы бұлшықетінің жарақатына байланысты бір айдан астам уақыт бойы алаңға шықпаған еді. Осылайша, қазақстандық футболшы қыркүйек айының басынан бері алғаш рет ойынға қатысты.
