«Реал» әсері: Алматыда 35 мың көрерменге арналған жаңа стадион салына бастады
Алматыда 35 мың жанкүйерге арналған ауқымды футбол стадионының құрылысы басталды.
Жаңа нысан халықаралық стандарттарға толық сәйкес келетін болады, деп хабарлайды Kazinform.
Қаланың әкімінің орынбасары Азамат Қалдбеков өңірлік коммуникациялар қызметінің брифингінде болашақ арена Қазақстандағы ең ірі және заманауи спорттық кешендердің бірі болатынын айтты. Мұнда халықаралық матчтар мен жоғары деңгейдегі турнирлер өткізу жоспарланып отыр.
«Жоба Алматы қаласының спорт инфрақұрылымын дамыту бағдарламасы аясында жүзеге асырылуда. Мақсат – қаланың елдегі спорттық орталық ретіндегі мәртебесін нығайту және тұрғындарға бұқаралық спортпен айналысуға қолжетімді жағдай жасау», — деді Қалдбеков.
Қазіргі уақытта елдегі ең үлкен стадион – 30 200 көрерменге арналған «Астана Арена». Одан кейінгі орындарда 23 804 адамға арналған Алматының «Орталық» стадионы және 20 000 орындық Шымкенттегі Қажымұқан Мұңайтпасов атындағы арена тұр.
Жаңа стадион оңтүстік астананың сәулеттік жауһары ғана емес, сонымен қатар қазақстандық үлкен футболдың жаңа ордасына айналмақ.
Сондай-ақ Петропавлда 5 мың көрерменге арналған заманауи футбол манежі салынады.
