ҚПЛ клубтары кімге тиесілі: командалардың иелері және олардың байлығы
Forbes Kazakhstan Қазақстандағы ең ықпалды 50 бизнесменнің рейтингін жаңартты. Олардың қатарында қазақстандық футболға тікелей қатысы бар бірнеше кәсіпкер бар, деп хабарлайды Sports24.kz.
«Шахтер» - Тимур Турлов
Қарағандылық «Шахтер» 2025 жылдың соңында Тимур Турловтың иелігіне өтті. Турловтың негізгі бизнесі Freedom Holding Corp. қаржы компаниясымен байланысты.
Forbes Kazakhstan-ның 2026 жылғы қазан айындағы рейтингінде Турлов елдегі ең бай бизнесмендер арасында алтыншы орында тұр.
«Жеңіс» - Михаил Ломтадзе
2025 жылдың қарашасында елордалық «Жеңіс» Михаил Ломтадзе тұлғасынан жаңа инвесторға ие болды.
Ломтадзе — Kaspi.kz компаниясының тең құрылтайшысы әрі бас директоры. Кәсіпкердің негізгі бизнесі қаржылық технологиялар мен электронды коммерцияға байланысты.
Forbes Kazakhstan оның байлығын шамамен 6 миллиард долларға бағалайды.
«Ордабасы» - Шахмурат Муталип
Шымкенттік «Ордабасы» 2026 жылдың жазында кәсіпкер Шахмурат Муталиптің бақылауына өтті.
Оның негізгі бизнесі құрылыс және инфрақұрылымдық жобалар саласында жұмыс істейтін Integra Construction KZ компаниясымен байланысты.
Forbes Kazakhstan кәсіпкердің байлығын 1,1 миллиард долларға бағалайды.
«Тұран» - Дінмұхамед Ыдырысов
2026 жылдың наурызында түркістандық «Тұранның» жаңа акционері кәсіпкер Дінмұхамед Ыдырысов болғаны белгілі болды.
Бизнесменнің негізгі мүдделері энергетика саласымен байланысты. Оның активтерінің қатарында жылу және электр энергиясын өндіру саласында жұмыс істейтін компаниялар бар.
Forbes Kazakhstan оның байлығын 605 миллион долларға бағалайды.
«Қызыл-Жар» - Сергей Кан
2025 жылдың қарашасында петропавлдық «Қызыл-Жардың» инвесторы Сергей Кан болды.
Кәсіпкер, ең алдымен, энергетика саласындағы активтерімен танымал. Атап айтқанда, ол Қазақстанның энергетикалық секторында жұмыс істейтін ЦАТЭК тобымен байланысты.
Forbes Kazakhstan Канның байлығын 450 миллион долларға бағалайды.
«Ақтөбе» - Нұрлан Артықбаев
2026 жылдың қаңтарында «Ақтөбенің» жеке инвесторы Нұрлан Артықбаев болды.
Кәсіпкер құрылыс бизнесімен және Qazaq Stroy компаниясымен танымал. Соңғы жылдары оның мүдделері өнеркәсіп секторына да таралды.
Forbes Kazakhstan-ның қазан айындағы рейтингіне сәйкес, Артықбаевтың байлығы 508 миллион долларға бағаланады.
«Қайсар» - Исламғали Козбаков
2025 жылдың 30 қазанында қызылордалық «Қайсар» TAU Group компаниясымен байланысты кәсіпкер Исламғали Козбаковтың бақылауына өтті. Компания тұрғын үй және әкімшілік ғимараттар салумен айналысады.
Оның капиталы туралы ашық дереккөздерде ақпарат жоқ.
«Оқжетпес» - Иван Сауэр
Кәсіпкер Иван Сауэр аграршылар тобымен бірге көкшетаулық «Оқжетпестің» дамуына белсенді қатысып келеді. Оның клуб қызметіне нақты қанша қаражат бөлетіні белгісіз. Алайда Иван Сауэр өз командасының футболшыларын алаңдағы нәтижелері мен пайдалы әрекеттері үшін миллиондаған сыйақымен жомарт түрде марапаттап келеді.
Ол Ақмола облысындағы ірі аграрлық жобалардың бірі — «Родина» агрофирмасын басқарады.
Forbes Kazakhstan оның байлығын 98 миллион долларға бағалайды.
«Адамдар жиі қателеседі» — Иван Сауэр Қайыров пен сыйақылар туралы
«Атырау» - Болат Қонарбай
2026 жылдың сәуірінде «Атырау» да жекеменшік клубқа айналды. Команданы «Болат-Жол» көлік-логистикалық компаниясымен байланысты кәсіпкер Болат Қонарбай сатып алды.
Қазақстандық бизнесмен әрі Мәжілістің бұрынғы депутатының нақты жеке капиталы жарияланбаған.
