Миллиондар бәрін шешпей ме? Жас Сәтпаев «Челсидің» жаңа ойыншысынан көрсеткіш жағынан озды
Қазақ футболының жас жұлдызы Дастан Сәтпаев тек Қазақстан Премьер-лигасында ғана емес, халықаралық статистикада да сенсация жасауды жалғастыруда. All For Football Talks дерегінше, «Қайраттың» 16 жастағы шабуылшысы 2025 жылғы маусымда «гол+пас» жүйесі бойынша 19 нәтижелі әрекетке қатысып үлгерген. Бұл көрсеткіш - атақты «Челсидің» жаңа ойыншысы, 18 жастағы бразилиялық Эстеван Виллианнан да жоғары. Эстеванда - 17 ұпай, ал оны ағылшын алпауыты 30 миллион еуроға «Палмейрастан» сатып алды.
Аса ірі трансфер аясында «Қайрат» сапында өнер көрсетіп жүрген қарапайым қазақстандық жасөспірімнің жетістігі футбол қауымдастығын таңғалдыруда. Сәтпаев - қазіргі футбол стереотиптерін бұзып, жаңа дәуірдің жаршысы іспетті.
Маусымның ең әсерлі сәттерінің бірі - оның УЕФА Чемпиондар лигасына іріктек кезеңіндегі «КуПС»-ке қарсы соққан голы болды. Бұрыштамадан кейін алыстан тепкен керемет голы үшін УЕФА-ның ресми парақшасы жас шабуылшыны атап өтті. Бұл - Дастанның халықаралық аренада да жарқырауға дайын екенін көрсетті.
Ең қызығы - 2026 жылдың жазында Дастанның өзі де Лондонға аттанады. Себебі дәл осы «Челси» қазақстандық дарынмен келісімшартқа отырып қойды. Әлемдік аренада аты шыққан жастарды артта қалдырып, Дастан Сәтпаев Еуропаға шықпай тұрып-ақ өз замандастарынан озық екенін дәлелдеуде.
