Мессидің империясы кеңеюде! Аргентиналық жұлдыз Испаниядағы екінші клубын сатып алды
«Алтын доптың» сегіз дүркін иегері Лионель Месси испандық «Эльденсе» футбол клубының жаңа қожайыны атанды, деп хабарлайды Sports24.kz.
Тараптар меншік құқығын беру жөніндегі мәміле аяқталғаннан кейін ресми мәлімдеме жасады.
Испанияның екінші дивизионында өнер көрсететін Эльда қаласының командасы аргентиналық футболшының қоржынындағы екінші клубқа айналды. Бұған дейін Месси каталониялық «УЕ Корнелья» клубын сатып алып, Испаниядағы футбол активтерінің толыққанды желісін құруға негіз қалаған еді.
Бұл сатып алу «Эльденсе» тарихындағы тағы бір маңызды тарауды ашты. Клубтың жаңа басшылығы инфрақұрылымды дамытуға, жастар академиясын жетілдіруге және спорттық әлеуетін арттыруға инвестиция салуды жоспарлап отыр. Мұның бәрі елдің екінші дивизионындағы тұрақты ілгерілеуді қамтамасыз етуге бағытталған.
Айта кетейік, «Эльденсе» — 1921 жылы құрылған Валенсия автономды қауымдастығындағы ең көне клубтардың бірі. Ал Лионель Месси болса, MLS-тегі «Интер Майами» клубының сапында алаңда жарқырауын жалғастырып келеді және еуропалық клубтарға иелік ететін қазіргі футболшылардың таңдаулы тобына қосылды.
Бұған дейін Мессидің Аргентина құрамасымен қоштасу матчын қашан өткізетіні белгілі болған еді.
