Месси «Интер Майамиден» кетеді
Аргентиналық футболдың аңызы Лионель Месси америкалық «Интер Майами» клубының орналасқан жерінен уақытша кетіп, Испанияға аттанады. Сапардың себебі — елдегі ең беделді марапаттардың бірі саналатын 2026 жылғы спорт саласындағы Астурия ханшайымы сыйлығын алу, деп хабарлайды Sports24.kz ESPN-ге сілтеме жасап.
«Интер Майами» шабуылшысы, 39 жастағы Лионель Месси жақын арада Испанияға аттанады. ESPN мәліметінше, аргентиналық футболшы спорт саласындағы Астурия ханшайымы сыйлығын табыстау рәсіміне қатысу үшін америкалық клубтың орналасқан жерінен уақытша кетеді. Футболшыға беделді марапат берілетіні 2026 жылдың маусым айында белгілі болған.
Сыйлық қазылар алқасы Лионель Мессидің кәсіби мансабындағы елеулі жетістіктерін атап өтті. Аргентиналық футболшы «Алтын доптың» сегіз дүркін иегері, әлем чемпионы және футбол тарихындағы ең атақты ойыншылардың бірі саналады. Сонымен қатар марапат оған спорттағы жетістіктері үшін ғана емес, қайырымдылық қызметі үшін де берілді. Қазылар алқасы Мессидің халықтың осал топтарына жататын балаларды қолдауға бағытталған әлеуметтік жобаларына ерекше мән берді. Бұл бастамалар білім мен медициналық көмекке қолжетімділікті қамтамасыз етуге ықпал етеді.
Испанияға жасалатын алдағы сапарына қарамастан, «Интер Майами» аргентиналық футболшының команданың келесі ойынын жібермейтініне сенеді. 24 қазанда америкалық клуб MLS тұрақты чемпионаты аясында «Нью-Йорк Ред Буллзға» қарсы сырт алаңда ойнайды. Дереккөздің мәліметінше, «Интер Майами» басшылығы мен бапкерлер штабы Мессидің АҚШ-қа уақытында оралып, матчқа қатысатынын күтуде. Осылайша, Испанияға сапар аргентиналық шабуылшының клуб сапындағы өнеріне айтарлықтай әсер етпеуі тиіс.
Еске салайық, Лионель Месси кәсіби мансабының басым бөлігін каталондық «Барселонада» өткізді. Испаниялық клуб құрамында аргентиналық футболшы он рет ел чемпионы атанды, Испания кубогын жеті рет жеңіп алды, Чемпиондар лигасында төрт мәрте топ жарды және УЕФА Суперкубогын үш рет иеленді.
Сонымен қатар шабуылшы Аргентина құрамасымен бірге 2022 жылы Катарда өткен әлем чемпионатында жеңіске жетті, 2008 жылғы Олимпиада ойындарының алтын медалін иеленді және Америка кубогын екі рет — 2021 және 2024 жылдары жеңіп алды.
