Әлюетов ҚПЛ-дегі «Оқжетпестің» жеңілісінен кейін жанкүйерлерден кешірім сұрады
«Оқжетпес» командасының бас бапкері Ринат Әлюетов Қазақстан Премьер-лигасының 28-туры аясында «Ұлытаудан» (0:2) жеңілгеннен кейін пікір білдірді, деп хабарлайды Sports24.kz.
Көкшетаулық ұжым 0:2 есебімен жеңіліп қалды. Бұл нәтиже Әлюетов командасының еурокубок жолындағы амбицияларына ауыр соққы болды.
«Біздің командалар деңгейінде “Ұлытау” — меніңше, маусымның жаңалығы. Олар көрсетіп жүрген футболы, оны қандай ынтамен ойнайтыны — үлкен құрметке лайық. Менің ойымша, бұл екі команда — маусымның жаңалығы. Ойынға келер болсақ, мұндай нәтижеден кейін сөйлеу өте қиын. Арманымызға жетуге сәл ғана қалғандай еді, ал біз мұнда бір қадам артқа шегіндік. Киім ауыстыратын бөлмеде жігіттермен сөйлестік. 23 күндік үзіліс бізге пайда әкелмеді деп ойлаймын. Бүгін біз екі мәселеге тап болдық: біріншісі — мұндағы алаңға бейімделе алмадық, екіншісі — ойын ырғағымызға әсер еткен 23 күндік үзіліс. Бүгінгі ойынымызға дәл осы екі фактор әсер етті деп есептеймін.
Бірақ жалпы былай айтар едім: әрқашан жаттықтырушы жеңіледі. Бұл жерде өз қателіктерімді көріп тұрмын, өйткені команданы осы матчқа тиісті деңгейде дайындай алмадым. Тағы да қайталаймын, барлық осы жағдайлар болды, сондықтан бүгінгі жеңілісті толығымен өз мойныма аламын. Себебі бастапқы құрамды таңдау және ауыстырулар тұрғысынан да жақсырақ ойнай алатынымызға сенемін.
Клуб тарихына енуге бірнеше ғана қадам қалған кезде, бүгінгідей ойнауға болмайды. Үлкен талдау жасалады. Алда өз алаңымызда өтетін екі матч бар, оларға өте мұқият дайындалуымыз керек, өйткені маусым соңын жоғары деңгейде өткізуіміз тиіс. Бұл үшін бар күшімізді саламыз.
Сондай-ақ осындай ұзақ жол жүріп келген жанкүйерлерімізден кешірім сұрағым келеді, ал біз олардың үмітін ақтай алмадық. Олар — біздің тірегіміз, 12-ойыншымыз. Оларға ерекше алғыс айтқым келеді. Ең бастысы — олар бізге сенсін, сонда бәрі ойдағыдай болады. Маусымның аяқталуына дейін тағы үш тур бар, жағдайды түзету үшін бар күшімізді саламыз», — деп келтіреді Әлюетовтің сөзін Sports.kz.
Бүгінгі матчтан кейін «Оқжетпес» 45 ұпаймен ҚПЛ турнирлік кестесінің бесінші сатысында қалды. «Ұлытау» 35 ұпай жинады. Жезқазғандық команда ҚПЛ кестесінде сегізінші орынға көтерілді.
