Лионель Мессиінің қарындасы Майамиде жол апатына түсті: не белгілі
«Интер Майами» шабуылшысы және Аргентина құрамасының капитаны Лионель Мессиінің кенже қарындасы – Мария Соль Месси – Майамиде орын алған ауыр жол апатында зардап шекті.
Бұл туралы аргентиналық Nueva Rioja басылымы хабарлады.
Дереккөздің мәліметінше, оқиға өткен аптада болған. Жолда келе жатып әйел кенеттен ұстамаға ұшырап, көлік басқаруын жоғалтып, қабырғаға соғылған. Оқиғаның ауырлығына қарамастан, өміріне қауіп төніп тұрған жоқ.
Бұл ақпаратты футболшының анасы Селия Куччиттини де растады. Оның айтуынша, Мария Соль қазірдің өзінде Аргентинада.
«Ол жақсы», – деп мәлімдеді ол.
Жол апаты салдарынан Мессидің қарындасы бірнеше ауыр жарақат алды: күйіктер, екі омыртқаның, өкше сүйегі мен білектің сынуы. Дәрігерлер ұзақ оңалту курсын тағайындады, сол себепті Мария Соль өзінің сүйіктісі, «Интер Майами» жастар командасының бапкері Хулиан Арельяномен өтетін үйлену тойын кейінге қалдыруға мәжбүр болды. Салтанатты шара 3 қаңтарда Росариода өтуі тиіс еді.
АҚШ-та медициналық көмек көрсетілгеннен кейін, зардап шеккен Мария Соль туған қаласы Росариоға жеткізілді. Енді ол реабилитацияны сол жерде жалғастырады. Хулиан Арельяно – «Интер Майами» U-19 құрамасының бапкері әрі Месси отбасымен 12 жылдан бері таныс.
Сондай-ақ Месси өз дәуірінің басты бапкерін атады.
