«Кристал Пэлас» жаңа кезеңге қадам басуда: Роберт Вуд Джонсон клубтың жаңа үлескері атанды
Англияның «Кристал Пэлас» футбол клубы акционерлік құрылымдағы өзгерістер туралы ресми түрде хабарлады.
АҚШ кәсіпкері Роберт Вуд Джонсон - Ұлттық футбол лигасындағы «Нью-Йорк Джетс» командасының тең иесі - өзінің отандасы Джон Текстор мен оның Eagle Football компаниясына тиесілі акциялар пакетін сатып алды.
Клуб мәлімдемесінде айтылғандай, келісім Англия Премьер-лигасының мақұлдауын күтуде, бірақ клуб басшылығы ешқандай кедергі болмайды деп сенеді және Джонсонның директорлар кеңесіне енуін асыға күтуде.
«Біз Роберт Джонсонды клуб серіктестері қатарында қарсы алуға қуаныштымыз. Сонымен қатар, Джон Тексторға клубтың дамуына қосқан үлесі үшін алғыс білдіріп, болашақтағы жобаларында сәттілік тілейміз», – делінген ресми хабарламада.
2024/25 маусымында лондондық клуб тарихи жетістікке жетіп, Англия кубогының иегері атанды және 2025/26 жылғы Еуропа лигасына жолдама алды. Алайда, клубтың халықаралық жарысқа қатысуы сұрақ астында қалған еді, себебі Текстор сол уақытта Францияның «Лион» клубының да үлесін иеленіп отырған. Бұл екі клуб та Еуропа лигасына өткен болатын. УЕФА ережелеріне сәйкес, бір турнирде бақ сынайтын екі клубтың бір иесі болмауы тиіс. Осы себепті, меншік иесінің ауысуы «Кристал Пэласқа» халықаралық аренада ойнауға толық мүмкіндік береді.
