Колумбия, Парагвай және Уругвай 2026 жылғы ӘЧ-на жолдама алды
Колумбия, Парагвай және Уругвай АҚШ, Канада және Мексикада өтетін 2026 жылғы әлем чемпионатының финалдық кезеңіне жолдама алды.
5 қыркүйек күні таңертең (Қазақстан уақыты бойынша) Уругвай мен Колумбия қатарынан 3:0 есебімен жеңіске жетіп, ӘЧ-ға шығу құқығына ие болды. Парагвайға Эквадормен 0:0 есебіндегі тең ойын да жеткілікті болды.
Осылайша, бүгінгі таңда болашақ әлем чемпионатына қатысатын 48 команданың 16-сы белгілі болды.
2026 жылғы әлем чемпионатының қатысушылары қатарында қожайын елдер Канада, Мексика және АҚШ-тан бөлек: Жапония, Жаңа Зеландия, Иран, Өзбекстан, Оңтүстік Корея, Иордания, Австралия, Аргентина, Бразилия, Уругвай, Колумбия, Парагвай және Эквадор бар.
2026 жылғы ӘЧ-ның іріктеу турнирі. Оңтүстік Америка
Топтық кезең. 17-тур
Колумбия – Боливия – 3:0 (1:0)
Голдар: Хамес, 31 (1:0). Кордоба, 74 (2:0). Кинтеро, 83 (3:0).
Парагвай – Эквадор – 0:0
Уругвай – Перу – 3:0 (1:0)
Голдар: Агирре, 14 (1:0). Де Арраскаэта, 58 (2:0). Виньяс, 80 (3:0).