Карло Анчелоттиді «Реал» аса құрметпен шығарып салмақшы
«Реал» басшылығы Карло Анчелоттимен өзара құрметке негізделген қоштасу туралы келісімге келді.
Италиялық маман келісімшарттың қалған бір жылы үшін өтемақы алып, клубтың мәңгілік елшісі атанады. Қазіргі келісімшарты 2026 жылға дейін жарамды, жылдық жалақысы — 11 миллион еуро.
Флорентино Перес Анчелоттидің кетуі ерекше құрметпен өтуін қалайды. «Реал» оны Бразилия құрамасына жіберуге қарсы болмайды және маусым соңында «Реал Сосьедадқа» қарсы «Бернабеуда» өтетін соңғы ойында қоштасу рәсімін ұйымдастырмақ.
Анчелотти клубпен байланысын жаттықтырушы қызметінен кейін де сақтайды. Бразилия құрамасының бапкері ретінде ол Милитао, Винисиус, Родриго және Эндрик сияқты ойыншылардың жағдайын бақылап, «Реалдың» базасы мен стадионына барып тұрады.
Мансабын аяқтаған соң, Анчелотти «Реалдың» халықаралық аренадағы ресми елшісі болады. Оның аңызға айналған мәртебесін мадридтік клубпен бірге екі кезеңде жеңіп алған 15 трофейі дәлелдейді.
